KazHackStan 2026: Kıberqaýipsizdik sarapshylary Astanada bas qosty
ASTANA. KAZINFORM – Astanada Ortalyq Azııadaǵy kıberqaýipsizdikke arnalǵan iri halyqaralyq konferentsııa – KazHackStan 2026 bastaldy. Bıylǵy forýmnyń negizgi taqyryby – tsıfrlyq ınfraqurylymnyń kıbershabýyldarǵa tótep berý qabileti.
Konferentsııaǵa memlekettik organdardyń ókilderi, otandyq jáne sheteldik kıberqaýipsizdik mamandary, stýdentter men oqýshylar qatysyp jatyr.
Uıymdastyrýshylardyń aıtýynsha, bıyl sharaǵa shamamen 10 myń adam kelmek.
Qazaqstannyń tsıfrlandyrý qarqyny artqan saıyn aqparattyq qaýipsizdiktiń mańyzy da kúsheıip otyr. Qazaqstan BUU-nyń elektrondy memlekettik qyzmetterdi damytý reıtınginde alǵashqy ondyqqa kiretin elderdiń qatarynda. Osyǵan baılanysty tsıfrlyq júıelerdi qorǵaý máselesi memlekettik organdar úshin de mańyzdy baǵyt bolyp otyr.
QR Ulttyq ekonomıka mınıstriniń orynbasary Bekbolat Moldabekovtiń aıtýynsha, mınıstrlik aqparattyq qaýipsizdik salasyndaǵy jańa tehnologııalar men úrdisterdi turaqty baqylaýda ustaıdy.
– Qazaqstan tsıfrlandyrý boıynsha aldyńǵy qatarly elderdiń biri. BUU reıtınginde memlekettik qyzmetter boıynsha segizinshi oryndamyz. Osy pozıtsııany ustap turý jáne odan ári jaqsartý úshin aqparattyq qaýipsizdik óte mańyzdy. Sondyqtan munda jańa dúnıelerdi kórýge, jańa tehnologııalardy zertteýge keldim, – dedi ol.
Onyń aıtýynsha, forým barysynda aqparattyq qaýipsizdik salasyndaǵy jańa sheshimder, qaýip-qaterler jáne olardan qorǵaný tásilderi qarastyrylady. Sondaı-aq sharada startaptar men jańa tehnologııalyq ázirlemeler tanystyrylady.
– Bizdegi aqparattyq qaýipsizdik basqarmasy osy baǵyttaǵy trendterdi, jańa tehnologııalardy turaqty baqylap otyrady. Munda usynylatyn sheshimderdi zerttep, qajet bolǵan jaǵdaıda óz jumysymyzǵa engizetin bolamyz, – dedi Bekbolat Moldabekov.
KazHackStan uıymdastyrýshysy, TsARKA vıtse-prezıdenti Rýslan Týrgýldınovtiń aıtýynsha, konferentsııa 2017 jyldan beri ótkizilip keledi. Buǵan deıin shara Almatyda uıymdastyrylsa, bıyl alǵash ret Astanaǵa kóshirilgen.
– Bıyl shamamen 10 myń qatysýshy kútip otyrmyz. Segiz jyl qatarynan konferentsııaǵa qatysýshylar men sarapshylar sany artyp keledi. Memlekettik organdardyń joǵary laýazymdy ókilderinen bastap stýdentterge deıin ártúrli aýdıtorııa qatysady, – dedi Rýslan Týrgýldınov.
Onyń aıtýynsha, konferentsııanyń basty ereksheligi – kıberqaýipsizdik máselelerin oqıǵalar men praktıkalyq mysaldar arqyly talqylaý.
Birinshi kúni memleket men bızneske qatysty aqparattyq qaýipsizdik máselelerine basymdyq berilse, ekinshi kún tehnıkalyq taqyryptarǵa arnalady. Sarapshylar kıbershabýyldardy taldap, shabýyldy qalaı toqtatqanyn nemese belgili bir júıedegi osaldyqty qalaı anyqtaǵanyn túsindiredi.
KazHackStan 2026 aıasynda oqýshylar arasynda da arnaıy kıberqaýipsizdik jarystary uıymdastyrylyp jatyr. Onyń biri – Qazaqstan quramasyn halyqaralyq kıberqaýipsizdik olımpıadasyna irikteý.
Uıymdastyrýshylardyń málimetinshe, bıylǵy fınaldyq kezeńnen ótken oqýshylar kelesi jyl boıy daıyndyqtan ótip, 2027 jyly Italııada ótetin halyqaralyq olımpıadada Qazaqstan atynan baq synaıdy.
Konferentsııaǵa Qazaqstanmen qatar Ózbekstan, Qyrǵyzstan, Ázerbaıjan, AQSh jáne Eýropanyń birqatar elderinen sarapshylar qatysyp otyr.
Aıta keteıik, buǵan deıin, Quryltaıda qylmyskerlerdi memleketaralyq izdeý jáne kıberqylmys taqyrybyndaǵy jańa kelisimder jaıly jazǵan edik.
