QAJ penıtentsıarlyq mekemelerinde ótkizilgen rejımdik-aldyn alý sharalary eleýli nátıjeler berdi
ASTANA. Maýsymnyń 16-sy. QazAqparat /Ǵalymjan Hasenov/ - Qylmystyq-atqarý júıesiniń barlyq mekemelerinde ústimizdegi jylǵy maýsymnyń 14-inen bastap «Rejım» rejımdik-aldyn alý sharalary ótkizilýde, dep habarlady QAJK baspasóz qyzmetinen.
Josparly is-sharanyń negizgi maqsaty, jedel ahýaldy saýyqtyrý jáne sottalǵandar men tergelip júrgen tutqyndaǵy azamattardyń ustalýy rejımin nyǵaıtýǵa baǵyttalyp otyr. Sonymen qatar, shara barysynda kolonııalarǵa tyıym salynǵan zattardyń kelý arnalaryna tosqaýyl jasaý baǵytyndaǵy jumys ta kúsheıtildi.
QAJ qyzmetkerleriniń baǵdarly jumystarynyń nátıjesinde, alǵashqy eki kúnniń ishinde kolonııaǵa zańsyz túrde jetkizilmek bolǵan 50 dana uıaly baılanys quraly, shamamen 150 lıtrdeı spırtti ishimdik pen ondaǵan gramm túrli esirtki zattary tárkilendi, dep atap ótti baspasóz qyzmetinde. Máselen. Shyǵys Qazaqstan oblysynyń Ulan aýdanynda OV-156/13 mekemesiniń qyzmetkerleri Óskemen qalasynda oblystyq ІІD Esirtki bıznesine qarsy kúres basqarmasynyń qyzmetkerlerimen birlese atqarǵan jedel-aldyn alý sharasy kezinde shetel markaly avtokólikti toqtatyp, tekserý kezinde onyń júrgizýshisinen geroın esirtkisin taýyp, tárkiledi. Kelesi bir jaǵdaıda, OV-156/20 mekemesinde jazasyn óteýshi sottalǵan azamatqa kezdesýge kelgen óskemendik bir azamattyń shulyǵynan jeti gramnan astam geroın esirtkisi tabylyp, tárkilendi.
