«QazGÓZ» JShS: Órt kezinde hımııalyq zattardyń aǵyp ketkeni týraly aqparat jalǵan
«Keshe jergilikti ýaqyt boıynsha saǵat 22.15-te kompressorlyq tsehte aýa tońazytqyshy tutandy. Biz dereý órtti sóndirý boıynsha sharalar qabyldadyq. Zaýyt birden toqtatyldy. Órtti sóndirýge jeke órt sóndirý toptary men TJD kúshteri jumyldyryldy. Saǵat 22.52-de órt sóndirildi. Eń bastysy qaıtys bolǵandar men zardap shekkender joq» – dep habarlady N. Tólepov.
Onyń aıtýynsha, saǵat 23.30-da mamandar kásiporyndy shekteýli rejımde iske qosýǵa kiristi. Qazir zaýyttyń júktemesi shamamen 30 paıyzdy qurap otyr. Kásiporyndy tolyq qýatyna shyǵarý úshin qalpyna keltirý jumystary jalǵasyp jatyr.
Sonymen qatar, N. Tólepov órttiń saldarynan tek aýa tońazytqyshynyń kótergish konstrýktsııasy ǵana búlingenin atap ótti. Negizgi jabdyqqa zııan kelgen joq.
Buǵan qosa, QazGÓZ dırektory oqıǵa kezinede hımııalyq zattardyń aǵyp ketýi týraly áleýmettik jelilerde tarap jatqan aqparattardy joqqa shyǵardy. Ol alańdaýǵa negiz joq ekenin basa aıtty.
«Bul jabdyq shıki gazdy aýa-sý ádisi arqyly salqyndatý úshin qoldanylady. Bul jabdyqta qandaı da bir hımııalyq zattar paıdalanylmaıdy. Sondyqtan jumyskerler jáne turǵyndardyń ómiri men densaýlyǵyna qaýiptiń joq ekenin senimmen aıta alamyn», – dedi N. Tólepov.
Onyń pikirinshe, zaýyttyń qyzmeti jaqyn arada tolyǵymen qalpyna keltiriletin bolady jáne suıytylǵan munaı gazymen qamtamasyz etý boıynsha aýtqýlar bolmaıdy.
Aıta keteıik, osyǵan deıin Jańaózende gaz óńdeý zaýyty órtengenin habarladyq.
Sondaı-aq Mańǵystaý oblysyn suıytylǵan gazben qamtamasyz etýde irkilister bolmaıtyny málim boldy.