Qazgıdromettiń boljamyna alańdap otyrmyz - TJK
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker Qazgıdromettiń boljamyna alańdap otyrǵanyn jetkizdi, dep xabarlaıdy QazAqparat tilshisi.
«Iá, biz Qazgıdromettiń boljamyna alańdap otyrmyz. 10-12 sáýir kúnderi Almaty, Shyǵys Qazaqstan, Pavlodar men Aqmola oblystarynda qatty jaýyn-shashyn bolady dep otyr. Eger jańbyr kóp jaýsa, sý tasqyny ýshyǵyp ketýi múmkin. Aptanyń aıaǵyna deıin qatty jaýyn bolmasa eken deımiz. Sonda úlken sý Astraxan men Atbasarmen tezdetip ótedi de, bizge kóp problema týǵyzbaıdy», - dedi V.Bekker elordada ótken baspasóz máslıxatynda.
Onyń aıtýynsha, Aqmola oblysynyń Býrabaı aýdynda eki kún boıy jańbyr jaýdy. Sol jerdegi sý qoımasy tasyp ketedi degen qaýip boldy. Biraq qosymsha arnalardy qazyp, qoımadaǵy sýdy jiberýge týra keldi.
Aıta keteıik, búgingi brıfıngte komıtet basshysy elordaǵa jaqyn Qosshy aýylyndaǵy aýyz sý máselesin túsindirdi.
«Ol jaqta aýyz sý jınaıtyn eki qondyrǵy bar. Bireýinde 6 uńǵyma, atalǵan qondyrǵy jumys istep tur. Oǵan qosa, taǵy bir qondyrǵyny salý jumystary bastalǵan bolatyn. Onda 14 uńǵyma bar. Dál osy qondyrǵynyń 9 uńǵymasyn sý basyp qaldy. Olardyń bári istemeı tur, qalǵany durys. Negizi, ol qondyrǵynyń qurylysy áli aıaqtalǵan joq. Resmı túrde paıdalanýǵa da berilmedi. Alaıda ol jerden aýyz sý turǵyn úılerge berilip turady», - deıdi V.Bekker elordada ótken baspasóz máslıxatynda.
Onyń aıtýynsha, tártip boıynsha jańa sý qondyrǵysynyń aınalasyn topyraqpen úıip tastaý qajet. Sonda ishine sý kirmeıdi. Biraq ondaı sharalar atqarylǵan joq.
«Negizi, qazir Qosshyda sý bar. Maǵan solaı baıandady. Biraq turǵyn úılerde aýyz sý joǵary qabattarǵa jetpeı jatyr. Qysym az, sol jaǵynan qıyndyq bar. 4-5 qabattarǵa jetpeı jatyr dedi», - dep atap kórsetti V.Bekker.
