«Qazgıdromettiń» Batys Qazaqstan oblysy boıynsha fılıalynyń dırektory sottaldy
ORAL. QazAqparat - Oral qalalyq soty «Qazgıdromet» RMK BQO fılıalynyń burynǵy dırektory Dáýlet Oralymbekovke qatysty aıyptaý úkimin jarııa etti, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, dırektor 2015-2016 jyldary qyzmet babyn asyra paıdalanyp, ózine paıda tabý maqsatynda atalmysh fılıal qyzmetkerlerine tólenetin syıaqydan - 1,541 mln teńge, jalaqyǵa qosylatyn ústeme aqydan - 1 638 592 teńge jáne issapar shyǵyndarynan 1 588 901 teńge zańsyz aqsha jınaýdy uıymdastyrǵan. Sonymen qatar fılıal qyzmetkerleri issaparda nebári úsh kún bolsa da, oǵan oblys aýdandarynda 54 kún boldy dep, resmı qujatqa kórineý jalǵan derekter engizgen. Іssaparǵa dep alynǵan qarjy D.Oralymbekovke berilip otyrǵan.
D.Oralymbekov QR QK 362-baby 4-bólimi 3-tarmaǵy (ózine paıda tabý maqsatynda qyzmet babyn asyra paıdalaný) jáne 369-baby 1-bólimine sáıkes (qyzmettik jalǵandyq) aıypty dep tanylyp, QK 58-baby 3-bólimi qoldanylyp, múlkin tárkileýmen jáne ómir boıyna memlekettik organdarda laýazymdy qyzmet atqarý quqyǵynan aıyrýmen birge 5 jyl 6 aıǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy. Oǵan qosa sottalýshydan «Qazgıdromet» RMK túrindegi memleket paıdasyna 1 588 901 teńge shyǵyn óndirildi.
Sot úkim taǵaıyndaǵan kezde onyń asyraýynda kámeletke tolmaǵan balasynyń bary eskerildi.
Sot úkimi zańdy kúshine engen joq.
