Qazgıdromet JI kómegimen aýa raıyn boljaı bastady
ASTANA. KAZINFORM – Qazgıdromet aýa raıyn boljaýda jasandy ıntellekt elementteri bar tsıfrlyq quraldardy qoldana bastady. Jańa tehnologııalar boljamdardyń dáldigin arttyrýǵa múmkindik beredi. Bul týraly Ekologııa jáne tabıǵı resýrstar mınıstri Álibek Qýantyrov Úkimette aıtty.
– Jyl basynan bastap «Qazgıdromet» qyzmeti JI elementteri bar tsıfrlyq quraldardy qoldanýdy bastady. Bul - WRF tsıfrlyq modeli (Weather Research and Forecasting – aýa raıyn tsıfrlyq boljaý modeli), – dedi Álibek Qýantyrov.
Jańa júıe 2 jáne 6 shaqyrymdyq keńistikterde aýa raıyn boljaýǵa múmkindik beredi. Boljamdar aldaǵy 48 saǵatqa, sondaı-aq 10 táýlikke deıingi kezeńge jasalady.
– Mundaı tehnologııalardy paıdalaný aýa raıy boljamdarynyń naqtylyǵyn arttyrýǵa múmkindik beredi. Onyń ishinde agrometeorologııalyq jáne gıdrologııalyq boljamdar, sondaı-aq aýa raıyna baılanysty eskertýlerdiń dáldigi jaqsarady. Bul aqparattyń memlekettik organdarǵa, uıymdarǵa jáne halyqqa ýaqytyly jetýine kómektesedi, – dedi Ekologııa mınıstri.
Qazgıdromet aýa raıy boljamdaryn jalpy halyqqa ǵana emes, memlekettik organdarǵa da turaqty túrde usynady. Aýyl sharýashylyǵyna qatysty boljamdar Aýyl sharýashylyǵy mınıstrligi men Úkimet Apparatyna aptasyna eki ret beriledi.
Óńirler boıynsha bir aptaǵa arnalǵan kúndelikti aýa raıy boljamdary da jasalady.
Buǵan deıin Á. Qýantyrov qazan men qarasha ádettegiden jylyraq bolatynyn aıtqan edi.
Energetıka vıtse-mınıstri Qaıyrhan Tutqyshbaev elimizdiń qaı óńirlerinde jylytý maýsymy bastalatynyn baıandady.
