Qazgıdromet: Úsh oblysta erteń daýyl soǵýy múmkin
ASTANA. QazAqparat - 24 mamyrda Soltústik Qazaqstan, Aqmola jáne Qostanaı oblystarynda daýyl jóninde eskertý jarııalandy, dep habarlaıdy QazAqparat tilshisi Qazgıdrometke silteme jasap.
Soltústik Qazaqstan oblysynda ońtústik-batys, batystan soǵaty jeldiń kúshi 15-20 m/s, keı jerlerde 23-28 m/s bolady dep kútiledi. Keı jerde naızaǵaı jarqyldap, burshaq jaýýy yqtımal. Petropavl qalasynda 24 mamyrda ońtústik-batys, batys jeliniń kúshi 15-20 m/s, ekpini 25 m/s bolatyny kútilip otyr. Kúndiz naızaǵaı jarqyldap, burshaq jaýýy múmkin.
«24 mamyrda Aqmola oblysynda keı jerlerde batystan, ontústik-batystan jel soǵady. Jeldiń ekpini 15-20 m/s bolýy múmkin. Túnde 2 gradýsqa deıin úsik kútiledi. Al Astana qalasynda 24 mamyrda túnde topyraq betinde 2 gradýsqa deıin úsik júrýi yqtımal. Kúndiz batystan, ońtústik-batystan jel soǵady (ekpini 15-20 m/s)», delingen habarlamada.
Sonymen qatar, kúndiz 24 mamyrda Qostanaı oblysynyń keı jerlerinde naızaǵaı, ekpini 15-20 m/s bolatyn jel kútiledi.
