Qazgıdromet taǵy birqatar óńirde eskertý jarııalady
ASTANA. QazAqparat - «Qazgıdromet» RMK aýa raıynyń buzylýyna baılanysty taǵy birqatar óńirde eskertý jarııalady, dep habarlaıdy QazAqparat.
Sınoptıkterdiń málimetinshe, 12 qazan kúni Batys Qazaqstan oblysynyń keı jerlerin tuman basyp, soltústikten soǵatyn jeldiń jyldamdyǵy 15-20 m/s deıin kúsheıedi. Oral qalasynda 12 qazanda soltústikten soqqan jeldiń ekpini 18 m/s artady.
13-14 qazan kúnderi Túrkistan oblysynda, 14 qazanda Jambyl, Almaty, Shyǵys Qazaqstan oblystarynda jaýyn jaýady. Taýly aımaqtarda jaýyn-shashyn qatty bolatyny (jańbyrdyń sońy qarǵa ulasady) kútiledi. 13 qazanda Jambyl oblysynda ońtústik-batystan soǵatyn jeldiń kúshi 15-20 m/s, ekpini keı jerlerde 23-28 m/s jáne 30 m/s jetetini boljanady. 14 qazanda kúndiz aýa temperatýrasy +5+10 gradýs bolady.
13 qazanda Kyzylorda oblysynyń keı jerlerinde soltústik-batystan jel soǵyp, onyń jyldamdyǵy 23-28 m/s artady. Keı jerlerde 30 m/s jáne odan asa ekpinde soǵady.
«Qazgıdromet» buǵan deıin ózge birneshe aımaqta eskertý jarııalaǵan bolatyn.
Máselen, Aqtóbe oblysynda 12-13 qazan kúnderi aýa temperatýrasy 10 gradýs jyly bolady. Túnde úsik júredi. Jeldiń jyldamdyǵy sekýndyna 15-20 metr jyldamdyqqa deıin jetedi. Oblystyń soltústik aýdandarynda qar aralas jańbyr jaýady. 12 qazanda Aqtóbede ótkinshi jańbyr jaýýy yqtımal.
Sonymen qatar, 12-13 qazan kúnderi Qostanaı, Soltústik Qazaqstan, Aqmola, Qaraǵandy oblystarynda, 13 qazanda Pavlodar oblysynda jaýyn-shashyn bolady. Jańbyrdyń sońy qarǵa ulasady. Jel aldymen ońtústik-batystan, artynsha soltústik-batystan sekýndyna 15-20 metr jyldamdyqpen soǵady, ekpini 25 m/s jetýi múmkin. Aýa temperatýrasy kúndiz 3-10 gradýs nólden joǵary bolady.
Astana qalasynda 12 qazanda kúndiz jáne 13 qazanda jańbyr jaýyp, onyń arty qarǵa ulasýy múmkin. 12 qazanda jel ońtústik-batystan 15-20 m/s jyldamdyqpen soǵady.
