«Qazgıdromet» Syrdarııada bıyl sýdyń az bolatynyn boljap otyr
Ekologııa, geologııa jáne tabıǵı resýrstar mınıstrliginiń redaktsııa saýalyna joldaǵan jaýabynda osyndaı málimet aıtylǵan.
«Aǵymdaǵy jyly respýblıkanyń ońtústik aýmaǵy boıynsha sý azdyǵy saqtalady. «Qazgıdromet» RMK gıdrologııalyq boljamyna sáıkes 01.03.2021 jylǵy jaǵdaı boıynsha Jambyl jáne Túrkistan oblystarynyń taýlarynda ylǵal jınaqtaý kezeńindegi jaýyn-shashyn mólsheri ortasha kóp jyldyq mánderden 29-48%-ǵa, Almaty oblysynda ortasha kóp jyldyq mánderden 8-42%-ǵa az. Jambyl jáne Túrkistan oblystarynyń taý ózenderiniń basseınderindegi qar qory ortasha kóp jyldyq mánderden 32-88%-ǵa, Almaty oblysynda ortasha kóp jyldyq mánderden 24-41%-ǵa az», - delingen vedomstvo jaýabynda.
Syrdarııanyń joǵary jaǵynda ornalasqan Qyrǵyzstan men Ózbekstan mamandarynyń da boljamy osyǵan uqsas.
«Qyrǵyzgıdromet» málimetterine sáıkes, 2020 jylǵy 1 qazannan bastap 2021 jylǵy 28 aqpanǵa deıingi kezeńde jaýyn-shashynnyń jınaqtalýy aýmaqtyń kóp bóliginde normadan 30-79%-ǵa kem jáne aıtarlyqtaı az boldy. Mysaly, 2021 jylǵy 25 naýryzdaǵy jaǵdaı boıynsha Shý-Talas basseıni boıynsha Kırov sý qoımasynyń (Qyrǵyz Respýblıkasy) kólemi ótken jylmen salystyrǵanda 110 mln tekshe metrge az. Sonymen qatar, Syrdarııa ózeniniń joǵary aǵysynda ornalasqan Toqtoǵul sý qoımasynyń (Qyrǵyz Respýblıkasy) kólemi ótken jylmen salystyrǵanda 3 000 mln tekshe metrge kem», - deıdi mınıstrlik mamandary.
Ózbekstandaǵy jaǵdaı da osyndaı. «Ózgıdromet» málimetteri boıynsha, 2021 jyldyń vegetatsııalyq kezeńinde Ferǵana alqabynyń ońtústigindegi ózenderdiń sýlylyǵy 90-100% saqtalady degen boljam bar. Alaıda Narynnyń sýlylyǵy 80-90%, Qaradarııada 70-80%, Shyrshyq, Ahangaran ózenderinde 70-75%, Ferǵana alqabynyń soltústigindegi ózenderde 65-75% shamasynda kútilip otyr.
«Osyǵan baılanysty vegetatsııa kezeńinde Syrdarııa ózeniniń joǵary aǵysyndaǵy elderden qajetti sý kólemi kelmeýi múmkin. Sonyń saldarynan Qyzylorda jáne Túrkistan oblystarynyń aýyl sharýashylyǵy taýar óndirýshilerin sýarmaly sýmen qamtamasyz etý boıynsha birqatar problemalar týyndaýy múmkin», - dep jazady mınıstrlik mamandary.
