Qazgıdromet sý tasqynyna qatysty boljamdy jarııalady
ASTANA. QazAqparat - «Qazgıdromet» RMK sý tasqynyna qatysty boljamyn jarııalady, dep xabarlaıdy QazAqparat tilshisi.
Mekeme basshysy Marat Kynatovtyń aıtýynsha, búginde birqatar oblystarda sý kólemi artyǵymen jınalyp qaldy. Atap aıtqanda, Qaraǵandy oblysynda Nura men Keńgir ózenderinde, Aqmola oblysynda Esil men Shaǵalyda, Soltústik Qazaqsanda Esil ózeninde, Qostanaı oblysynda Toǵyzaq pen Torǵaıda, Aqtóbe oblysynda Qosistekte, sondaı-aq, Batys Qazaqstanda Ýtva, Chıja-2, Derqul men Shaǵan ózenderinde sýdyń normasy 120-170 paıyzǵa artyq bolyp tur.
«Ásirese, Batys Qazaqstan erekshe baqylaýǵa alyndy. Ol jaqta sýdyń jınalý kólemi normadan eki esege artyq, al ótken eki jylmen salystyrǵanda eki-úsh esege kóp bolyp tur», - dedi M.Kynatov Astanada ótken baspasóz máslıxatynda.
Qazgıdromettiń málimetine sáıkes, qazirdiń ózinde Qaraǵandy oblysynda Samarqand pen Keńgir sý qoımalary 73-82 paıyzǵa, Soltústik Qazaqstannyń Sergeev qoımasy 94 paıyzǵa, al Shyǵys Qazaqstandaǵy Shúlbi qoımasy 89 paıyzǵa tolyp tur.
«Sol sebepti atalǵan sý qoımalaryna quıylatyn ózenderde sý tasýy qaýpi bar», - dep atap kórsetti M.Kynatov.
Illıýstratsııalyq sýret
