«Qazgıdromet» sý tasqyny qaýpi joǵary óńirlerdi atady
ASTANA. KAZINFORM – «Qazgıdromet» RMK 2024 jylǵy sý tasqyny boıynsha negizgi boljamdaryn jarııalady.
Qazaqstannyń jazyq ózenderindegi kóktemgi sý tasqyny aǵynynyń kútiletin kólemi gıdrometeorologııalyq baqylaýlar men ólsheý derekterine sáıkes jasaldy.
«Qazgıdromet» RMK óńdegen «NASA» spýtnıkteriniń Jerdi qashyqtan zondtaý sýretteri boıynsha 2024 jylǵy 1 naýryzdaǵy jaǵdaıǵa sáıkes, Qazaqstannyń 72% aýmaǵynda qar jabyny bar. Jaýyn-shashyn mólsherin, qardaǵy sý qoryn, topyraqtyń kúzgi ylǵaldyǵy kórsetkishterin, topyraqtyń qatý tereńdigin, sondaı-aq ózenderdiń muz rejımderin taldaı otyryp, sý tasqyny qaýipti aımaqtarǵa aldyn-ala baǵa berildi», - dep jazylǵan «Qazgıdromet» RMK habarlamasynda.
Osylaısha, sý tasqyny qaýpi joǵary óńirler retinde Abaı, Aqmola, Aqtóbe, Almaty, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan jáne Jetisý oblystary ataldy.
Orta qaýiptegi óńirler – Atyraý, Jambyl, Qyzylorda, Pavlodar, Túrkistan jáne Ulytaý oblystary bolsa, Mańǵystaý oblysynda sý tasqyny qaýpi joq. Qazirgi ýaqytta qar jınalý protsesi jalǵasyp jatyr.
