Qazgıdromet: Shyǵys Qazaqstan oblysynda naızaǵaı oınap, burshaq jaýady
ÓSKEMEN. QazAqparat – «Qazgıdromet» RMK-nyń Shyǵys Qazaqstan oblysy boıynsha fılıaly aýa raıyna baılanysty eskertý jasady.
Kásiporyn ókilderiniń málimetinshe, 29 shilde kúni Shyǵys Qazaqstan oblysynyń keı jerlerinde naızaǵaı oınap, jel turady, burshaq jaýýy yqtımal. Ońtústik-batystan soqqan jel, artynsha soltústik-batysqa qaraı oıysyp, jyldamdyǵy sekýndyna 15-20 metr bolady.
Osyǵan baılanysty jergilikti turǵyndarǵa qaýipsizdik sharalaryn qolǵa alǵan jón.
«Naızaǵaı oınaǵan kezde esik-terezeniń bárin myqtap bekitip, elektr qurylǵylaryn toqtan ajyratyp, múmkindiginshe úıde bolǵan jón. Eger kóshede júrgen bolsańyz temir qorshaýlar men elektr taratatyn qurylǵylardyń, jarnama baǵandarynyń, avtobýs aıaldamalarynyń janynda jáne aǵashtyń astynda turmańyz. Sý janynda bolsańyz, sýǵa túspeńiz. Jaǵalaýdan múmkindiginshe alysyraq turǵan jón. Tótenshe jaǵdaı bola qalsa, «112» nómirini telefon shalyńyz», - delingen Tótenshe jaǵdaılar departamentiniń habarlamasynda.
