Qazgıdromet: Shilde aıynda aýa temperatýrasy +45 gradýsqa deıin jetedi
ASTANA. KAZINFORM — Konsýltatıvti boljamǵa sáıkes, shilde aıynyń basynda belsendi tsıklon men atmosferalyq fronttardyń ótýine baılanysty Qazaqstannyń basym bóliginde aýa raıy qubylmaly bolady.
Jańbyr jaýyp, naızaǵaı oınaıdy, burshaq jaýýy, ekpindi jeldiń kúsheıýi múmkin.
Eldiń ońtústiginde, sondaı-aq Almaty oblysy men Jetisý oblysynyń taýly jáne taý bókterindegi aýdandarynda mol jaýyn-shashyn kútiledi.
Aıdyń birinshi onkúndiginde kúndizgi aýa temperatýrasy joǵarylap, qatty jáne óte qatty ystyq bolady:
elimizdiń batysynda +18…+27°S-tan +30…+38°S-qa deıin;
Mańǵystaý oblysynda +22…+30°S-tan +35…+40°S-qa deıin, oblystyń ońtústiginde +43°S-qa deıin;
soltústik-batysta +17…+25°S-tan +33…+40°S-qa deıin;
respýblıkanyń soltústiginde +20…+28°S-tan +33…+38°S-qa deıin;
ortalyqta +23…+33°S-tan +32…+40°S-qa deıin;
ońtústikte +25…+33°S-tan +37…+44°S-qa deıin;
elimizdiń ońtústik-shyǵysynda +23…+28°S-tan +33…+42°S-qa deıin.
Pavlodar oblysynda kúndizgi aýa temperatýrasy +28…+33°S-tan +20…+25°S-qa deıin qubylady.
Respýblıkanyń shyǵysynda aptap ystyq birtindep báseńdep, kúndizgi aýa temperatýrasy +30…+38°S-tan +25…+35°S-qa deıin tómendeıdi.
Jalpy, aıdyń ekinshi jáne úshinshi onkúndikterinde turaqty ystyq kezeńder nóserli jańbyr, naızaǵaı, ekpindi jel jáne shańdy daýyl bolatyn kúndermen almasady. Qazaqstannyń basym bóliginde eń ystyq kúnderi kúndiz aýa temperatýrasy +33…+39°S-qa deıin, al respýblıkanyń batysy men ońtústik jartysynda +35…+45°S-qa deıin kóteriledi. Jekelegen kúnderi aýa temperatýrasynyń tómendeýi boljanady: respýblıkanyń soltústik jartysynda kúndiz +20…+28°S-qa deıin, al ońtústik jartysynda +23…+33°S-qa deıin tómendeıdi.
Aıta ketelik Qazgıdromet 2-4 shildege arnalǵan Qazaqstan boıynsha aýa raıy boljamyn jarııalaǵan edi.
