Qazgıdromet: Sáýirdiń 10-y kúngi aýa raıy boljamy
NUR-SULTAN. QazAqparat – Sáýirdiń 10-y kúni atmosferalyq frontaldy bólikterdiń ótýine baılanysty respýblıkanyń basym bóliginde qar, jaýyn jaýyp, eldiń batysynda ǵana kún ashyq bolady.
Respýblıkanyń keı jerlerinde tuman túsip, jel kúsheıip, ońtústik-batysta, jáne ońtústikte shańdy daýyl kóteriledi, dep habarlaıdy QazAqparat «Qazgıdromet» RMK-nyń málimetterine súıene otyryp.
Qyzylorda, Mańǵystaý oblystarynyń birqatar aýmaqtarynda jel kúsheıip, jyldamdyǵy sekýndyna 15-20 metrge jetedi, kúndiz shańdy daýyl kóteriledi.
Jambyl, Qostanaı, Soltústik Qazaqstan, Shyǵys Qazaqstan, Almaty oblystarynyń birqatar aýmaǵynda tuman bolyp, sekýndyna 15-20 metr jyldamdyqpen jel soǵady.
Túrkistan, kúndiz Batys Qazaqstan, Aqtóbe oblystarynyń keı jerlerinde jel kúsheıip, sekýndyna 15-20 metr jyldamdyqpen uıtqıdy.
Aqmola, Qaraǵandy oblystarynyń birqatar aýmaqtarynda tuman túsedi.
