Qazgıdromet: Respýblıkanyń shyǵysynda jáne ońtústik-shyǵysynda jaýyn-shashynsyz aýa raıy kútilýde
ASTANA. 12 shilde. QazAqparat - Qazaqstan aýmaǵynyń basym bóliginde aýa raıynyń turaqsyzdyǵy saqtalady, dep habarlanǵan «Qazgıdromet» RMK-ǵa silteme jasap, QR TJM saıtynda.
Qazaqstanda birqatar jerlerinde naızaǵaı oınap, jańbyr jaýady, burshaq jaýyp, uıytqyǵan jel soǵýy múmkin, keı jerlerde shań kóterilip, daýyl turady, tek respýblıkanyń shyǵysynda jáne ońtústik-shyǵysynda jaýyn-shashynsyz aýa raıy kútilýde.
Aqmola, Ońtústik Qazaqstan, Atyraý, Qyzylorda, Pavlodar, Batys Qazaqstan, Aqtóbe oblystarynda, túnde Mańǵystaý oblysynda, kúndiz Qaraǵandy oblysynyń keı jerlerinde jel 15-20 m/s-qa deıin kúsheıedi dep kútilýde.
Qyzylorda, Batys Qazaqstan oblystarynda shań kóterilip, daýyl turýy múmkin.
Qostanaı oblysynda, kúndiz Jambyl oblysynyń keı jerlerinde 15-20 m/s jel soǵady, kúndiz burshaq jaýýy múmkin.
Soltústik Qazaqstan oblysynda jel 15-20 m/s-qa kúsheıedi, túnde jáne tańerteń keı jerlerde tuman túsedi dep kútilýde.
Almaty, Jambyl oblystarynda, Atyraý, Qaraǵandy, Shyǵys Qazaqstan oblystarynyń birqatar aımaqtarynda qatty ystyq bolady dep kútilýde.
Respýblıkanyń soltústik-batysynda, ońtústiginde, ońtústik-shyǵysynda jáne ortalyǵynyń keı jerlerinde tótenshe joǵary órt qaýpi saqtalady.
