Qazgıdromet respýblıkada mınýs 40-45 gradýsqa deıin aıaz bolatyndyǵy týraly eskertý jasady
ASTANA. 30 qańtar. QazAqparat - 31 qańtar túninde, 1-2 aqpan kúnderi qatty aıaz bolady dep kútilýde: Almaty oblysynyń soltústik-shyǵysynda jáne Jambyl oblysynda -30, -35 gradýs, Pavlodar, Shyǵys Qazaqstan oblystarynda -40,-45 gradýs, Qaraǵandy oblysynyń soltústik-shyǵysynda -40, -45 gradýs aıaz bolady, dep habarlaıdy «Qazgıdromet» RMK.
31 qańtar túninde, 1-2 aqpan kúnderi Aqmola, Soltústik Qazaqstan oblystarynda -40,-43 gradýs aıaz bolady dep kútilýde, 1-2 aqpan túnderi Mańǵystaý oblysynda -22 gradýsqa deıin sýytady.
Qazaqstannyń kóp bóliginiń 31 qańtardaǵy aýa raıyna Kar jáne Barents teńizderi aýdandarynan kelgen sýyq aýa massalary áser etedi. Respýblıkanyń kóp bóliginde aıazdy kún raıy saqtalady, jekelegen oblystarda jeldiń kúsheıýi, burqasyn, tuman, kóktaıǵaq bolýy múmkin.
Mańǵystaý oblysynda keıbir jerlerde kóktaıǵaq, jeldiń sekýndyna 15-20 metrge deıin kúsheıý bolady dep kútilýde. Soltústik Qazaqstan oblysynda keıbir jerlerde tuman bolýy múmkin. Qyzylorda, Aqtóbe, Atyraý, kúndiz Qostanaı oblysynda keıbir jerlerde burqasyn, jeldiń sekýndyna 15-20 metrge deıin kúsheıýi múmkin. Ońtústik Qazaqstan, Jambyl oblystarynda keıbir jerlerde tuman, kóktaıǵaq, sekýndyna 15-20 metrge deıin soǵatyn ekpindi jel, Ońtústik Qazaqstan oblysynyń jekelegen aýdandarynda - jaıaý burqasyn bolýy múmkin. Almaty oblysynda túnde keıbir jerlerde qalyń qar jaýyp, tuman bolady, Jalańashkól stansasy aýdanynda ońtústik-shyǵystan soǵatyn jeldiń sekýndyna 15-20 metrge deıin kúsheıýi kútilýde.
Pavlodar, Almaty oblysynyń soltústik-shyǵysynda túnde qatty aıaz bolady dep kútilýde. Qaraǵandy oblysynda túnde qatty, keıbir jerlerde óte qatty aıaz bolady. Soltústik Qazaqstan, Aqmola oblysynyń keıbir jerlerinde, Jambyl oblysynyń soltústik-shyǵysynda túnde qatty aıaz bolady dep kútilýde.
