«Qazgıdromet» óz qyzmetkerleriniń ustalýyna qatysty túsinikteme berdi

ASTANA. QazAqparat - «Qazgıdromet» RMK basshylyǵy para aldy degen kúdikpen óz qyzmetkerleriniń ustalýyna qatysty túsinikteme berdi, dep habarlaıdy QazAqparat tilshisi.

«QR Ulttyq qaýipsizdik komıtetiniń habarlamasyna sáıkes, kúdikti retinde «Qazgıdromet» RMK Qaraǵandy oblysy boıynsha fılıalynyń dırektory R.I. Andrıanov jáne «Qazgıdromet» RMK bas dırektorynyń orynbasary N.K. Sultanov ustaldy. «Qazgıdromet» RMK júrgizilgen tergeý is-sharalaryna qoldaý kórsetip, barlyq suratylǵan materıaldarǵa kedergisiz qol jetkizýdi qamtamasyz etip otyr. Sonymen birge, «Qazgıdromet» RMK júrgizilgen jedel-tergeý is-sharalary jóninde habarsyz ekendigin málimdeıdi», - delingen habarlamada.

Eske sala ketsek, QR Ulttyq qaýipsizdik komıtetiniń baspasóz qyzmeti búgin «Qazgıdromet» RMK-nyń birqatar basshylary ustalǵanyn habarlaǵan bolatyn.

«Aǵymdaǵy jyldyń 17 qańtarynda Ulttyq qaýipsizdik komıteti júrgizgen sharalar nátıjesinde «Qazgıdromet» RMK-nyń birqatar basshylary QR QK 366-baby 4-tarmaǵymen kózdelgen qylmysty jasady degen kúdikpen ustaldy» delingen habarlamada.