Qazgıdromet: Mamyrdyń 21-i kúngi aýa raıy boljamy
NUR-SULTAN. QazAqparat – Mamyrdyń 21 kúni Qazaqstan aýmaǵynda aýa raıy qubylmaly bolady. Kóp jerlerde jaýyn jaýyp, keı jerlerde tipti nóserletedi.
Respýblıkanyń birqatar aýmaǵynda naızaǵaı oınap, jel kúsheıedi, burshaq jaýyp, ońtústik-batysta shańdy daýyl soǵady, dep habarlaıdy QazAqparat «Qazgıdromet» RMK-nyń málimetterine súıene otyryp.
Shyǵys Qazaqstan oblysynyń keı jerlerinde jel kúsheıip, jyldamdyǵy sekýndyna 15-20 metrge jetedi. Túnde jáne tań ata keı jerlerde tuman túsip, birqatar aýmaqtarda burshaq jaýýy da yqtımal.
Soltústik Qazaqstan oblysynyń keı jerlerinde kúshti jel turyp, burshaq jaýýy yqtımal, túnde birqatar óńirde jeldiń kúshi sekýndyna 15-20 metrge jetedi, kúndiz de solaı, ekpini 23 metrge deıin barady.
Qostanaı, kúndiz Jambyl oblysynyń keı jerlerinde jel kúsheıip, burshaq jaýady.
Aqmola, Pavlodar oblystarynyń keı aýmaqtarynda jel kúsheıip, jyldamdyǵy sekýndyna 15-20 metrge jetedi, burshaq jaýýy da yqtımal.
Qaraǵandy, Atyraý, kúndiz Aqtóbe, Mańǵystaý, Qyzylorda oblystarynda jeldiń kúshi sekýndyna 15-20 metrge jetedi. Mańǵystaý oblysynyń keı jerlerinde shańdy daýyl turady.
Shyǵys Qazaqstan oblysy men ońtústikte órt qaýpi saqtalady.
