Qazgıdromet qystyń úsh aıyna boljam jasady
ASTANA. QazAqparat - Qańtar aıy aıazdy bolady. Bul týraly baspasóz máslıhatynda «Qazgıdromet» RMK aýa raıynyń uzaqmerzimdi boljamdar basqarmasynyń basshysy Gúlmıra Aqysheva málim etti.
«Jeltoqsan aıyna toqtalatyn bolsaq, qar mol jaýady degen boljam bar. Tek Batys Qazaqstan jáne Shyǵys Qazaqstan oblystarynda shamadan az jaýady»,-dedi ol.
«Qazgıdromet» RMK málimetine qaraǵanda, Qostanaı, Soltústik Qazaqstan, Aqmola, Jambyl, Ońtústik Qazaqstan, Qyzylorda oblystarynda jáne Qaraǵandy oblysynyń basym bóliginde normadan artyq qar túsedi dep kútilýde.
«Aldaǵy 2017 jyldyń qysy edáýir sýyq bolady. Qańtar aılary saryshunaq aıazymen tosyn minez tanytady. Qańtarda Soltústik Muzdy muhıtynan enetin sýyq aýa massalaryna baılanysty elimizdiń basym bóliginde temperatýralyq fon ortasha kóp jyldyq kórsetkishten 1 gradýsqa tómen bolady», -dedi G. Aqysheva.
Onyń sózine qaraǵanda, aqpanda ádettegiden sýyq bolady dep boljanyp otyr, tek Batys Qazaqstan, Atyraý jáne Mańǵystaý oblystarynda mólsher shamasynda qalyptaspaq.
«Aqpan aıynda Batys Qazaqstan, Mańǵystaý, Atyraý, Qyzylorda jáne Ońtústik Qazaqstan oblystarynda qar shamadan az jaýady, al qalǵan óńirlerde mólsher shamasynda baıqalady»,-dedi ol.
«Uzaqmerzimdi boljamdardyń temperatýra boıynsha ortasha saqtalýy 65 paıyz, al jaýyn-shashyn turǵysynda 60 paıyzdy quraıtyndyqtan, bul maýsymdyq boljamdardy konsýltatıvtik keńes retinde paıdalanǵan jón. Aldaǵy ýaqytta bul uzaqmerzimdi boljamdarymyz aılyq boljamdarmen, al aılyq boljamdar óz kezeginde onkúndik jáne qysqamerzimdi kórsetkishtermen naqtylanyp otyrady»,-dedi G. Aqysheva.
