«Qazgıdromet» Qytaıdyń MAZU júıesin Qazaqstanda qoldanbaq
ASTANA. KAZINFORM- Úrimshi qalasynda «Qazgıdromet» RMK bas dırektory Danara Alımbaeva men Qytaı meteorologııalyq ákimshiliginiń basshysy Chen Chjenlın arasynda ekijaqty kezdesý ótti.
Kezdesýde taraptar zamanaýı tehnologııalardy engizý, erte eskertý júıelerin damytý jáne qaýipti aýa raıy qubylystaryn boljaý salalaryndaǵy yntymaqtastyqty talqylady.
Kezdesýdiń negizgi taqyryptarynyń biri MAZU júıesi boldy. «Qazgıdromet» bul júıeni Qazaqstanda qysqa merzimdi boljaý, nowcasting jáne jasandy ıntellekt múmkindikterin paıdalaný baǵyttarynda praktıkalyq turǵyda qoldanýǵa múddeli.
Sonymen qatar Fengyun spýtnıktik derekterin paıdalaný jáne aýa raıy protsesterin baqylaýdyń zamanaýı quraldaryna qoljetimdilikti keńeıtý máselelerine erekshe nazar aýdaryldy.
Kezdesý qorytyndysy boıynsha taraptar atalǵan baǵyttar boıynsha jumysty jalǵastyryp, aldaǵy praktıkalyq qadamdardy aıqyndaýǵa kelisti.
Osyǵan deıin Qazaqstan men Qytaı ýnıversıtetteri medıakommýnıkatsııa salasynda birlesip jumys isteıtini belgili boldy.
