«Qazgıdromet» elordadaǵy tútinge qatysty túsinik berdi
NUR-SULTAN. QazAqparat – «Qazgıdromet» RMK Nur-Sultan qalasynyń 24 men 25 shilde aralyǵyndaǵy atmosferalyq aýasynyń jaı-kúıi týraly aıtyp berdi, dep habarlaıdy QazAqparat.
Sınoptıkterdiń málimetinshe, Nur-Sultannyń atmosferalyq aýasynyń monıtorıngi 10 bekette, atap aıtqanda, alty avtomattyq bekette jáne synamalardy qoldan irikteıtin tórt bekette ótkizilýde. Jalpy, Nur-Sultan qalasynda joǵary jáne ekstremaldy joǵary deńgeıdegi lastaný tirkelmegen.
24-25 shilde aralyǵynda tańerteń jáne keshke azdaǵan joǵarylaý baıqaldy. №6 avtomattyq bekettiń aqparatyna sáıkes (Aqjol kóshesi, «Astana Tazalyq» aǵyndy sýlar tundyrǵysy aýmaǵy), RM – 2,5 qatty bólshek boıynsha - 1,0-1,8 shekti ruqsat etilgen kontsentratsııa shamasyndaǵy joǵarylaýdyń 30 jaǵdaıy tirkelgen (eń joǵarǵysy 25 shildede saǵat 08:00-de). № 7 avtomattyq bekettiń málimeti boıynsha (Túrkistan kóshesi 2/1, RFMM), RM-2,5 qatty bólshek boıynsha – 1,1-1,8 shekti ruqsat etilgen kontsentratsııa shamasyndaǵy joǵarylaýdyń 29 jaǵdaıy tirkelgen (eń joǵarǵysy 25 shildede 08:20-da).
Sınoptıkalyq jaǵdaıǵa keler bolsaq, 25 shilde kúni túnde Nur-Sultanda soltústikten sekýndyna 1-3 metr jyldamdyqpen bolmashy jel esti, aýanyń salystyrmaly ylǵaldylyǵy - 98-99%. 5 km-den ary kórinbeıtin tútindi tuman tústi. 08:40-tan bastap óndiristik tútin qaptady, aýanyń salystyrmaly ylǵaldylyǵy - 70%.
Sondaı-aq, Pavlodar oblysy da sońǵy eki kún boıy kúıiktiń ıisi aralas tútinge oranǵan.
