«Qazgıdromet» elimizdiń 15 óńirinde aýa raıyna baılanysty eskertý jarııalady
NUR-SULTAN. QazAqparat - «Qazgıdromet» respýblıkamyq memlekettik kásipornynyń málimetteri boıynsha elimizdiń 15 óńirinde aýa raıyna baılanysty eskertý jarııalandy, dep habarlaıdy QazAqparat.
Kásiporyn taratqan málimetterge qaraǵanda, nóser jaýynǵa baılanysty Túrkistan, Jambyl, Almaty oblystarynyń taýly aýdandarynda jáne Almaty qalasyna irgeles aýmaqtarda betkeılik aǵynnyń qalyptasýy jáne ózenderdegi sýdyń deńgeıi kóterilýi múmkin.
15 mamyrda Nur-Sultan qalasynda kún kúrkirep, burshaq jaýýy múmkin. Tańerteń jáne kúndiz ońtústik-batystan soqqan jeldiń ekpini sekýndyna 17-22 metr bolady. Aýa raıy boljamynyń yqtımaldylyǵy 80-90%.
Aqmola oblysynyń basym bóliginde jańbyr jaýady degen boljam bar. Keı jerlerde naızaǵaı oınap, daýyl turyp, burshaq jaýýy múmkin. Jel ońtústik-batystan soltústik-batysqa qaraı soǵyp, túnde keı jerlerde sekýndyna 15-20 metr, kúndiz 15-20, keı jerlerde sekýndyna 23 metr bolady.
Almaty qalasynda nóser jaýyn, burshaq jaýyp, jel turyp, naızaǵaı oınap, jeldiń ekpini sekýndyna 15 metrge jetedi. Almaty oblysynda nóser jaýyn, burshaq jaýyp, naızaǵaı oınap, daýyl soǵýy múmkin. Naızaǵaı kezinde jeldiń ekpini sekýndyna 17-22 metrge jetedi.
Shymkent qalasynda naızaǵaı oınap, daýyl soǵady. Naızaǵaı kezindegi jeldiń ekpini sekýndyna 15-20 metrge jetedi.
Túrkistan oblysynda nóser jaýyn, burshaq jaýyp, naızaǵaı oınap, naızaǵaı kezinde jeldiń ekpini sekýndyna 15-20 metr bolady.
Qyzylorda oblysynda keı jerlerde tuman túsip, kóktaıǵaq bolyp, jeldiń ekpini sekýndyna 15-20 metrge jetedi.
Qaraǵandy oblysynyń keı jerlerinde kún kúrkirep, jel sekýndyna 15-20 metr jyldamdyqpen uıtqıdy.
Qostanaı oblysynda nóser jaýyn, burshaq jaýyp, naızaǵaı oınap, jeldiń ekpini sekýndyna 15-20 metrge jetedi.
Pavlodar oblysynda jeldiń ekpini sekýndyna 15-20 metrge, keı jerlerde 23 metrge jetedi.
Soltústik Qazaqstan oblysynda jańbyr jaýyp, keı jerlerde nóserletedi. Sondaı-aq naızaǵaı oınap, daýyl turyp, burshaq jaýady, jeldiń ekpini sekýndyna 15-20 metrge jetedi.
Tótenshe jaǵdaılar komıteti azamattardy aýa raıyn baqylap otyrýǵa, aýa raıyna baılanysty eskertýlerdi tyńdap, qajetti saqtyq sharalaryn saqtaýǵa shaǵyrady.
«Aýa raıyna baılanysty eskertýlerde jeldiń ekpini sekýndyna 15-20 metrge, tipti sekýndyna 30 metrge jetýi múmkin ekendigi aıtylady. Osyǵan qaraı, ártúrli eldi mekenderde qaýipsizdik tehnıkasy boıynsha erejelerdi saqtaýǵ shaqyramyz. Shaǵyn qalalar men megapolısterde daýyl óte qaýipti»,-delingen habarlamada.
Osy oraıda tótenshe jaǵdaılar qyzmeti turǵyndardy eskertedi:
Terezeler! Qatty daýyl kezinde úıdegi nemese páterdegi barlyq terezeler myqty jabylýy tıis.
Balkondar! Shynylanbaǵan balkondar men lodjııalardan qatty jel kezinde syrtqa túsýi múmkin barlyq zattardy (qumyralar, bankalar, jáshikter, shólmekter jáne t.b.) alyp tastaý kerek. Shynylanbaǵan balkondardan daýyl kezindegi ramalarmen birge eski terezeler ushyp ketken jaǵdaılar boldy.
Kóshede! Kóshede daýyl turǵan kezde jarnama qalqandarynan (jáne basqa da aspaly qurylymdardan), avtobýs aıaldamalarynan, elektr berý jelilerinen, sondaı-aq aǵashtardan múmkindiginshe alys júrińiz. Aınalańyzǵa qarańyz, ózińizdi jan-jaǵyńyzdaǵy adamdarǵa qulap ketýi múmkin zattardy baıqańyz. Qulaýy múmkin úzilgen symdar men syrǵıtyn zattarǵa (aǵashtarǵa) jaqyndaýǵa bolmaıdy.
Panalaý! Qatty jel bolǵan jaǵdaıda jaqyn mańdaǵy ǵımarattan nemese basqa jerden yq taýyp, jel saıabyrsyǵansha saıalaı turý kerek.
Úlken aǵashtar! Úlken aǵashtardyń astyna avtokólik qoıýǵa bolmaıdy, óıtkeni aǵash qulaǵan kezde basyp qalýy múmkin. Shirigen jáne eski, sondaı-aq jalǵyz turǵan aǵashtar óte qaýipti.
«Úıde qalyńyzdar, ózińizdi jáne jaqyndaryńyzdy qorǵańyzdar»-deıdi QR ІІM TJK baspasóz qyzmeti.
