Kazgıdromet balyq qyrylǵan Talǵar ózeninen 3 synama aldy
ALMATY. QazAqparat – Almaty oblysy Talǵar ózeninde balyqtardyń qyrylýynan soń Qazgıdromet RMK ózen sýynan 3 synama alǵan, dep habarlaıdy QazAqparat tilshisi.
BAQ-ta jáne «Facebook» jelisinde Almaty oblysy Bazarkeldi aýyly janyndaǵy Talǵar ózeninde balyqtardyń qyrylýy men sýdyń qaraıýy týraly taralǵan beıneaqparat boıynsha 27 mamyrda «Qazgıdromet» RMK qalalyq fılıaly zerthanasynyń mamandary 3 núktede jospardan tys sý synamalaryn aldy. Olardyń birinshisi - «Adal Cút» JShS fermasynan 0,5 shaqyrym joǵary, ekinshisi - «Adal Cút» JShS fermasyna taıaý, úshinshisi «Adal Cút» JShS fermasynan 0,5 shaqyrym tómen tustan alynǵan.
«Jer beti sýynyń sapasyn taldaý 44 fızıkalyq hımııalyq kórsetkish boıynsha júrgiziledi. Onyń ishinde bas ıondar, bıogendi, organıkalyq jáne organıkalyq emes zattar, aýyr metaldar tekseriledi. Birinshi taldaý nátıjeleri boıynsha sý temperatýrasy 25,1-26,4 ºC bolǵan. Sýtegi kórsetkishi 8,1-8,2, sýda eritilgen otteginiń shoǵyrlanýy qalypty mólsherde jáne 7,4-7,7 mg/dm3 dıapazonynda, túsi – 6-7 gradýs, móldirligi – 20 sm, ıisi – 1 ball, tabıǵı sýǵa tán emes ıis (qı ıisi) seziledi», - dep málim etti «Qazgıdromet» RMK.
Qalǵan kórsetkishter boıynsha qosymsha aqparat 29 mamyrda belgili bolady. Ottegini bıohımııalyq tutynýǵa taldaý nátıjeleri 5 táýlik daıynalatynyna baılanysty onyń nátıjesi 1 maýsymda jarııalanady.
Eske sala ketsek, Talǵar ózeninde balyqtardyń qyrylǵanyn aıtyp jergilikti turǵyndar dabyl qaqqan. Ekologııalyq belsendi Olga Gýmırova vıdeony Facebook paraqshasynda jarııalady.
QR Ekologııa, geologııa jáne tabıǵı resýrstar mınıstrliginiń Orman jáne malsharýashylyǵy komıtetiniń baspasóz hatshysy Sáken Dildahmettiń aıtýynsha, 27 mamyrda Almaty oblysy Qapshaǵaı qalasy terrıtorıaldyq ınspektsııasynyń memlekettik ınspektorlary oqıǵa ornyna baryp, tekserý júrgizgen. Odan bólek sýdyń sapasyn anyqtaýǵa «Kazgıdromet» RMK qyzmetkerleri zerthanalyq synama aldy.
Osyǵan uqsas oqıǵa Almatyda 26 naýryzda bolǵan edi. 28 panfılovshylar parkinde 20-30 kepter qyrylyp qalǵan.
Qala turǵyndary qustar dezınfektsııalyq zattardan ýlandy degen boljam aıtty.
Alaıda, Ulttyq referenttik ortalyq mamandary olardyń ólimine qatysty shyǵarǵan qorytyndyda hımııalyq ýlanýdy joqqa shyǵardy.
«Qus tumaýy, Nıýkasl indeti, orbıtoz, hlamıdıoz, pasterıoz sııaqty ınfektsııalyq aýrýlar joq ekendigi anyqtaldy. Qustardyń aǵzasynan aýyr metall tuzdary, hlor tabylmady», - dedi ortalyq mamandary.
