Kazgıdromet balyq qyrylǵan Talǵar ózeni sýynyń sapasyn taldaý nátıjesin jarııalady

BAQ-ta jáne «Facebook» jelisinde Almaty oblysy Bazarkeldi aýyly janyndaǵy Talǵar ózeninde balyqtardyń qyrylýy men sýdyń qaraıýy týraly taralǵan beıneaqparat boıynsha 27 mamyrda «Qazgıdromet» RMK qalalyq fılıaly zerthanasynyń mamandary 3 núktede jospardan tys sý synamalaryn aldy.

«Sýdaǵy ottegi tutynýynyń bıohımııalyq taldaýy 5 táýlik boıy qalypty mólsherde bolǵan (0,8-1,0 mg/dm3)», - dedi «Kazgıdromet» RMK.

Birinshi taldaý nátıjeleri boıynsha sý temperatýrasy 25,1-26,4 ºC bolǵan. Sýtegi kórsetkishi 8,1-8,2, sýda eritilgen otteginiń shoǵyrlanýy qalypty mólsherde jáne 7,4-7,7 mg/dm3 dıapazonynda, túsi – 6-7 gradýs, móldirligi – 20 sm, ıisi – 1 ball, tabıǵı sýǵa tán emes ıis (qı ıisi) seziledi», - dep málim etti «Qazgıdromet» RMK.

ıAǵnı sý quramynda ýly hımııalyq zattar joq.

Eske sala ketsek, osyǵan deıin jergilikti turǵyndar Talǵar ózeninde balyqtar qyrylyp jtatqanyn aıtyp dabyl qaqqan. Ekologııalyq belsendi Olga Gýmırova vıdeony Facebook paraqshasynda jarııalady.

QR Ekologııa, geologııa jáne tabıǵı resýrstar mınıstrliginiń Orman jáne mal sharýashylyǵy komıtetiniń baspasóz hatshysy Sáken Dildahmettiń aıtýynsha, 27 mamyrda Almaty oblysy Qapshaǵaı qalasy terrıtorıaldyq ınspektsııasynyń memlekettik ınspektorlary oqıǵa ornyna baryp, tekserý júrgizgen.

Odan bólek sýdyń sapasyn anyqtaý úshin «Kazgıdromet» RMK qyzmetkerleri zerthanalyq synama aldy.

Osyǵan uqsas oqıǵa Almatyda 26 naýryzda bolǵan edi. 28 panfılovshylar parkinde 20-30 kepter qyrylyp qalǵan. Qala turǵyndary qustar dezınfektsııalyq zattardan ýlandy degen boljam aıtty. Alaıda, Ulttyq referenttik ortalyq mamandary olardyń ólimine qatysty shyǵarǵan qorytyndyda hımııalyq ýlanýdy joqqa shyǵardy.

«Qus tumaýy, Nıýkasl indeti, orbıtoz, hlamıdıoz, pasterıoz sııaqty ınfektsııalyq aýrýlar joq ekendigi anyqtaldy. Qustardyń aǵzasynan aýyr metall tuzdary, hlor tabylmady», - dedi ortalyq mamandary.