Qazgıdromet astyq egetin negizgi oblystarda egin oraǵy kezindegi aýa raıyn boljady
ASTANA. QazAqparat - Elimizdiń negizgi astyq egetin óńirlerinde egin oraǵy naýqany kezinde aýa temperatýrasy jyly jáne jaýyn-shashyn norma sheginde bolady. Bul týraly «QazAqparat» saýalyna «Qazgıdromet» RMK habarlady.
Tamyzdyń aıaǵyna qaraı, ıaǵnı 25 tamyz kezinde Qostanaı, Soltústik Qazaqstan jáne Aqmola oblystary aýmaǵynda ótkinshi jańbyr, sondaı-aq keı jerlerde15-20 m/s jel soǵady dep boljanýda.
Degenmen, Qostanaı oblysynda aýa raıynyń temperatýrasy joǵarylaý bolady dep kútilýde. Bul óńirde temperatýra túnde 18 gradýsqa deıin, al kúndiz 18...23 deńgeıinde qalyptaspaq. 26-28 tamyz kezinde oblysta aýmaǵynda jaýyn-shashynsyz, kúndizgi temperatýra 15...20 aralyǵynda bolady. 29-31 tamyzda keı jerlerde ótkinshi jańbyr, aýa temperatýrasy kúndiz 18...23 jylylyqty kórsetedi.
Al endi qyrkúıek aıynda atalǵan úsh oblystaǵy aldyn ala aýa raıy boljamyna toqtalatyn bolsaq, SQO-da jyly jáne birshama ylǵaldy bolmaq. Bir aıda ortasha alǵanda aýa temperatýrasy plıýs 13...14°S deńgeıinde qalyptasyp, bul normadan 2°S-ge joǵary. Oblystyń soltústik-batysynda jaýyn-shashynnyń aılyq kólemi kóbirek bolmaq (norma: 26...33 mm), sondaı-aq óńirdik qalǵan bóliginde normaǵa jaqyn deńgeıde jaýady dep kútilýde (norma: 25 mm).
Budan bólek, qyrkúıekte Qostanaı oblysynda aıtarlyqtaı jyly jáne ylǵaldy aýa raıy boljanyp otyr. Ortasha aılyq aýa temperatýrasy plıýs 14... 17°S-ge jetip, bul óz kezeginde kóp jylǵy kórsetkishten 1...2°S-ge joǵary. Jaýyn-shashynnyń aılyq kólemi normadan artyqtaý.
Aqmola oblysynda da aýa raıy jyly ári birshama ylǵaldy bolmaq. Qyrkúıektegi ortasha aýa temperatýrasy plıýs 12...14°S deńgeıinde qalyptaspaq. Bir aıdaǵy jaýyn-shashyn mólsheri norma deńgeıinde boljanýda.
Budan buryn habarlanǵandaı, ótken aptada Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov astyq egetin negizgi oblystarda maýsymnyń birinshi bóliginde normadan tómen atmosferalyq jaýyn-shashyn men sýyq aýa raıy baıqalǵanyn aıtqan edi.
«Astyq egetin oblystardyń kópshilik bóliginde maýsymnyń ekinshi jartysynda jáne shilde aıynda jaýǵan mol jaýyn-shashyn vegetatıvtik massanyń qalyptasýyna, dándi daqyldar damýynyń sozylýyna, jazdyq bıdaı egisterinde aýrýlardyń taralýyna jáne damýyna ákelip soqty. Aqmola, Qostanaı jáne Soltústik Qazaqstan oblystarynda shilde aıynda jaýyn-shashynnyń mólsheri normadan 2-3 ese artyp, bul bıik bıdaı sabaǵynyń qalyptasýyna, sonyń saldarynan jekelegen tanaptarda eginniń jatyp qalýyna áser etti», - dedi Q. Aıtýǵanov.
Onyń sózine qaraǵanda, jalpy alǵanda, maýsym jáne shilde aılarynda oń tıimdi temperatýralardyń jetkiliksizdigi baıqaldy. Ol dándi, maıly jáne dándi burshaqty daqyldardyń ósip-jetilýin shekteıdi. Egý merzimderine baılanysty eginniń damyp-jetilýiniń sozylýy maýsym aıynda jaýyn-shashyn norma sheginde bolǵan óńirlerde 5-7 kúndi, jaýyn-shashyn normadan 2-3 ese joǵary bolǵan óńirlerde 7-10 kúndi qurady.
«Osyny eskerip, aýa raıynyń kópjyldyq tájirıbesine súıensek, tamyz aıynda egistiń damyp-jetilýden artta qalýshylyǵy saqtalatyn bolady jáne jappaı egin jınaýdyń bastalýy qyrkúıek aıynyń birinshi onkúndiginiń sońynda kútilýde. Tamyz aıynda aýa raıy ystyq bolǵan jaǵdaıda jappaı egin jınaýdyń bastalýy tamyz aıynyń sońy men qyrkúıek aıynyń basynda kútilýde», - dep atap ótti vıtse-mınıstr.
