«Qazgıdromet» Astananyń aspanyn torlaǵan tútinge qatysty pikir bildirdi
ASTANA. QazAqparat - «Qazgıdromet» RMK Gıdroortalyǵynyń dırektory Marına Shmıdt sońǵy kúnderi Astananyń aspanyn nelikten tútin basyp turǵanyn túsindirip berdi, dep habarlaıdy «QazAqparat» HAA tilshisi.
«13 jeltoqsannan bastap bizde mońǵol antıtsıklony tirkeldi. Ol birshama aýmaqtyń, sonyń ishinde Astananyń da aýa raıyna áserin tıgizdi. Antıtsıklon tynyq ári ashyq aýa raıy kezinde paıda bolady. Demek, atmosferada aýa almasý bolmaıdy. Osy sebepti, zııandy zattar jınalyp qalyp, tútinniń týyndaýyna sebep bolyp otyr», - deıdi ol Astana ákimdiginde ótken baspasóz máslıhatynda.
Marına Shmıdtiń aıtýyna qaraǵanda, «Qazgıdromet» RMK jaısyz meteojaǵdaıǵa baılanysty boljam jasamaıtyndyqtan, halyqqa aldyn ala bul jaǵdaı eskertilmegen. Al «Qazgıdromet» meteojaǵdaıǵa baılanysty boljamdy 2018 jyldan bastap jasaýdy josparlap otyr. Bul boljamdar meteojaǵdaılar zııandy zattardyń jınalýyna sebep bola ma, joq pa degen sekildi aqparattardy usynatyn bolady.
«Astanany qorshaǵan jasyl beldeý jeldiń azaıýyna sebep bolady degendi qazir birden boljaý múmkin emes. Keıbir jyldary bizde jeldiń jıiligi azaıdy. Bári de klımattyq jaǵdaılar men sınoptıkalyq ahýaldarǵa baılanysty», - deıdi Marına Shmıdt.
