Qazgıdromet Astanadaǵy nóser jańbyrǵa qatysty túsinikteme berdi (FOTO/VIDEO)
«22 shilde túngi ýaqytta Astanada 14 mm jańbyr jaýdy. Jalpy 1-22 shilde aralyǵynda elordada 49,3 mm jańbyr jaýǵan, qalypty deńgeı - 50 mm ekendigin eskeretin bolsaq, normadan aýytqý 99 paıyzdy qurady. Jaqyn kúnderi 23 shilde túnde jáne 24 shilde kúndiz qysqa merzimdi jańbyr men nóser bolady. Keıin temperatýra birtindep joǵaryla bastaıdy, túnde 13-15 gradýs, kúndiz 23-28 gradýs jyly», - dep atap ótti «Qazgıdromet» RMK qysqa merzimdi aýa-raıy boljamy basqarmasynyń basshysy Ardaq Qalmenova «QazAqparat» tilshisine bergen jaýabynda.
Bunyń aldynda «QazAqparat» agenttigi habarlaǵanyndaı, Astanada nóserletip jaýǵan jańbyrdan qala kóshelerin sý basyp, adamdar men kólikterdiń qatynaýyna edáýir qıyndyqtar týǵyzǵan. Sınoptıkterdiń málimdeýinshe, demalys kúnderi Qazaqstannyń basym bóliginde aýa-raıy jaýyn-shashyndy bolady.
Astanada Orynbor, Qonaev, Respýblıka, Baýyrjan Momyshuly sııaqty ortalyq kóshelerdi sý basqan.
«Orynbor-Qonaev qıylysynda 10 nómirli marshrýttyń ishindegi jolaýshylar joldaǵy oqıǵany ózderiniń smartfondaryna túsirip alǵan. Onda avtobýstyń sý ústimen «júzip» ótkenin kórýge bolady», - deıdi qala turǵyndarynyń biri.
foto: © 2016 «QazAqparat»