Qazgıdromet: 8 sáýirge arnalǵan aýa raıy boljamy
ASTANA. QazAqparat - Qazaqstannyń soltústigi men shyǵysynda atmosferalyq frontaldyq aǵyndardyń ótýine baılanysty aýa raıynyń qolaısyzdyǵy saqtalady. Jer-jerlerde jaýyn-shashyn bolyp, kóktaıǵaq oryn alyp, kúshti jel soǵyp, soltústiktiń basym bóliginde jel kúsheıedi. Respýblıkanyń batys men ońtústigi jaýyn-shashynsyz. Keı jerlerde tuman kútiledi.
Aqmola, Qostanaı oblystarynda jel 15-20-ǵa kúsheıip, keıbir jerlerde ekpini 23-28 m/s-qa jetedi, jekelegen aýdandarda kóktaıǵaq bolyp, Qostanaı oblysynyń keı óńirlerinde tuman túsedi. Pavlodar oblysynda jel 18-23-ke kúsheıedi, keı aımaqta ekpini 27 m/s-qa jetedi. Soltústik Qazaqstan oblysynda túnde keı jerlerde qatty jel soǵady, kúndiz basym bólikte jel 15-20 kúsheıip, ekpini 25 m/s-qa jetedi. Jekelegen aýdandarda tuman, kóktaıǵaq oryn alady. Shyǵys Qazaqstan oblysynyń keıbir aımaqtarynda jel 15-20-ǵa jetip, túnde ekpini 25 m/s-qa kúsheıedi, keı jerlerde tuman túsedi. Qyzylorda, Mańǵystaý, Atyraý, Aqtóbe, Qaraǵandy oblystarynda, túnde Almaty, Jambyl, kúndiz Batys Qazaqstan oblystarynyń keı óńirlerinde jel 15-22 m/s-qa kúsheıedi. Ońtústik Qazaqstan, Jambyl, Atyraý, túnde Almaty oblysynyń keıbir jerlerinde tuman kútiledi.
