Qazgıdromet: 10 qańtarǵa arnalǵan aýa raıy boljamy
ASTANA. 9 qańtar. QazAqparat - 10 qańtar kúni respýblıkanyń basym bóliginde qar jaýyp, boran soǵady. Jel kúsheıip, keıbir jerlerde tuman túsýi yqtımal. Bul týraly «Qazgıdrometke» silteme jasap, QR TJM baspasóz qyzmetinen habarlady.
Aqmola, Soltústik Qazaqstan, Pavlodar, Qostanaı oblystarynda, kúndiz Aqtóbe oblysynda boran soǵyp, jel ekpini 15-22 m/s bolady. Almaty oblysynyń Jalańashkól aýdanynda jel 15-20 m/s-qa deıin kúsheıedi. Qyzylorda oblysynda, túnde jáne tańerteń Ońtústik Qazaqstan oblysynyń birqatar aımaqtaryna tuman túsedi. Atyraý, Batys Qazaqstan oblystarynyń keı jerlerine tuman túsedi, kóktaıǵaq bolyp, jel ekpini 15-20 m/s bolýy múmkin. Jambyl oblysynda, túnde Mańǵystaý oblysynda tuman bolyp, jel 15-22 m/s-qa deıin barady. Shyǵys Qazaqstan oblysynda ekpini 15-20 m/s jel soǵyp, burqasyn bolady.
