«Qazgıdrogeologııa» mamandary AQSh-ta tájirıbe almasty
ASTANA. KAZINFORM — Qazaqstandyq mamandar AQSh-ta jerasty sýyn basqarýdyń zamanaýı tehnologııalaryn meńgerip jatyr. Bul týraly Sý resýrstary jáne ırrıgatsııa mınıstrligi málim etti.
QR Sý resýrstary jáne ırrıgatsııa mınıstrligi men AQSh Geologııalyq qyzmeti (USGS) arasyndaǵy yntymaqtastyq týraly memorandým aıasynda qazaqstandyq gıdrogeologtar AQSh-tyń jerasty sýyn basqarý salasyndaǵy ozyq tájirıbesimen tanysty.
Oqý Boıse qalasynda ótti. Qazaqstandyq mamandar Aıdaho shtatynyń Sý resýrstary ǵylymı ortalyǵy janyndaǵy jerasty sýy oqý ortalyǵynyń jumysymen, jerasty sýyn monıtorıngteý júıelerimen, sondaı-aq jerasty sý kózderin modeldeý jáne qorǵaý ádisterimen tanysty. Sonymen qatar gıdrogeologııa jáne jerasty sý resýrstaryn basqarý máseleleri boıynsha ǵylymı kezdesýler, tehnıkalyq semınarlar men tájirıbelik talqylaýlar uıymdastyryldy. Barlyq shyǵyndy amerıkalyq tarap óz moınyna aldy.
— Bul tájirıbe otandyq gıdrogeologııa mamandarynyń biliktiligin arttyrýǵa, jerasty sýyn basqarýdyń zamanaýı tehnologııalaryn engizýge jáne AQSh sarapshylarymen kásibı yntymaqtastyqty nyǵaıtýǵa múmkindik beredi, - dedi «Qazgıdrogeologııa» ulttyq gıdrogeologııalyq qyzmeti basqarma tóraǵasynyń orynbasary Daır Ibraev.
Aıta keteıik, qazaqstandyq 200 maman Qytaıda oqýdan ótip, sýdyń lastanýyn tejeý tásilderin meńgeredi.
