«Qazgıdrogeologııa» 700-den astam jańa bulaq tapty
ASTANA. KAZINFORM — «Taza Qazaqstan» tujyrymdamasyn iske asyrý aıasynda Sý resýrstary mınıstrligi bulaqtardy, jaǵalaý aýmaqtaryn tazartýǵa jáne sýǵa uqypty qaraý mádenıetin qalyptastyrýǵa baǵyttalǵan «Móldir bulaq» aýqymdy ekologııalyq aktsııasyn bastady.
Sý resýrstary jáne ırrıgatsııa vıtse-mınıstri Talǵat Momyshevtyń aıtýynsha, 2025 jyldyń qyrkúıeginde ótken aktsııa elimizdiń barlyq óńirin qamtydy. Oǵan 4 myńnan astam adam qatysyp, shamamen 300 tonna qoqys jınalǵan, ondaǵan shaqyrym jaǵalaý aýmaqtary tazartylǵan.
— 2026 jyldyń naýryzynda «Móldir bulaq» naýqany jalǵasyn tapty. Alǵashqy kezeńde Almaty, Jambyl, Qyzylorda, Túrkistan oblystary, Jetisý oblysy men Shymkent qalasyn qamtydy. Bul joly 9 myńnan astam adam qatysyp, 30 bulaq tazartyldy. Sonymen qatar, bulaq kózderin ashý, qalpyna keltirý, aýmaqtardy abattandyrý, qoqys jınaý jáne kóshet otyrǵyzý jumystary júrgizildi, — dedi T. Momyshev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, «Qazgıdrogeologııa» ulttyq qyzmeti respýblıka aýmaǵyndaǵy bulaqtardy túgendeý jumystaryn júrgizip jatyr. Aldyn ala derekter boıynsha 700-den astam jańa bulaq anyqtalyp, arhıvtik málimetter negizinde 2772 bulaqty qamtıtyn karta jasalǵan. Mamandar bulaqtardy sý tapshylyǵy jaǵdaıynda qosymsha sý kózi retinde qarastyryp otyr.
Joba aıasynda Jambyl oblysynda «Bolashaqtyń qaınary» atty sý salasyndaǵy alǵashqy eriktiler qozǵalysy quryldy. Oǵan Taraz qalasyndaǵy stýdentter tartylyp, jastardyń ekologııalyq mádenıetin qalyptastyrýǵa basymdyq berilip keledi.
Bastama qoǵam tarapynan keń qoldaý tapqan. Eldiń ár óńirinde azamattar óz erkimen senbilikter uıymdastyryp, bulaqtardy tazartý jumystaryna belsendi qatysyp jatyr. Aktsııaǵa iri kompanııalar men qoǵamdyq uıymdar da qosylǵan.
Aldaǵy ýaqytta, 2026 jyldyń sáýir aıynda, «Móldir bulaq» aktsııasyn elimizdiń qalǵan 12 óńirinde ótkizý josparlanyp otyr. Joba jyl saıyn turaqty túrde uıymdastyrylmaq.
Aıta keteıik, sý únemdeý tehnologııalaryna 214 mlrd teńgeden astam qarjy bólinedi.
Kásiporyndar 7 jylda sýdy qaıta paıdalanýǵa kóshýge mindetteledi.
