«Qazgeologııa» áýeden ken izdeýge jańa tehnologııany paıdalandy
ASTANA. QazAqparat - «Qazgeologııa» AQ men Polımetall (Reseı) arasyndaǵy yntymaqtastyq týraly memorandýmdy iske asyrý sheńberinde bıyl Qostanaı oblysynyń Shekara alańynda barlaý jumystary bastaldy, dep habarlaıdy QazAqparat QR IDM baspasóz qyzmetine silteme jasap.
Atap aıtqanda, bıyl 31 tamyzdan 13 qazanǵa deıin ındýstrıaldy altyn-kúmis ken oryndaryn, mys-altyn skarndy, altyn-sýlfıdti kenderdi taýyp, perspektıvaly ýchaskelerdi anyqtaý maqsatynda aerogeıofızıkalyq jumystar júrgizildi.
Keshendi aerogeofızıkalyq túsirilim quramynda magnıtologııalyq jáne elektrli barlaý bar. Polıarızatsııalaný týraly aıqyn derekter alý úshin VTEM modıfıkatsııasynda ótpeli protsesti qoldanylady.
Biregeı VTEM nemese VersatileTime Domain Electro Magnetic júıesi 10 jyldan astam paıdalanylatyn eń ınnovatsııalyq, minsiz jáne tabysty aeroutqyrlyq júıe bolyp tabylady.
Qazirgi zamanǵy tsıfrlyq elektronıka men sıgnaldardy óńdeý ádisterin paıdalanatyn qabyldaǵyshtyń patenttelgen dızaınynda shý deńgeıi óte tómen bolady. Zertteý tereńdigi men elektromagnıttik ólshemderdiń dáldigi turǵysynan apparatýranyń balamasy joq.
Zertteý tereńdigi 800 metrge deıin jetedi. Álemniń birneshe óńirlerindegi synaq alańdarynda VTEM-men jasalǵan aerofoto túsirilimder básekeles aerogeofızıkalyq elektromagnıttik júıelermen salystyrǵanda tamasha nátıjeler kórsetti.
Túsirilimdi «Qazgeologııa» AQ men kanadalyq GeotechLtd kompanııasy arasynda birlesken kásiporyn bolyp tabylatyn «Qazgeoteh» JShS jasady. Jumys kólemi shamamen 6,5 myń km aýmaqty qamtydy. Jumystyń nátıjeleri boıynsha geologııalyq barlaý jumystaryn odan ári tereńdetý jóninde usynystar jasalady.
Aıta ketý kerek, bul - «Polımetall» AQ-nyń Qazaqstandaǵy alǵashqy izdestirý jobasy.
