«Qazgeologııa» aldaǵy eki jylda 100 mıllıon dollar ınvestıtsııa tartýdy kózdep otyr
ASTANA. QazAqparat - «Qazgeologııa» AQ aldaǵy eki jylda 100 mıllıon dollar ınvestıtsııa tartýdy kózdep otyr. Bul týraly búgin QR Investıtsııalar jáne damý mınıstrliginde «Qazgeologııa» AQ basqarma tóraǵasy Ǵalym Nurjanov málim etti.
«Qazirgi ýaqytta «Qazgeologııa» eki jylda 50 mıllıon dollar ınvestıtsııa tartqan. Menińshe, aldaǵy eki jylda bul kórsetkishti 100 mıllıon dollarǵa deıin ulǵaıta alamyz», - dep atap ótti ol Geologtar kúnine oraı ótkizilgen saltanatty jıynda.
Onyń málim etýinshe, kompanııa qazir Qazaqstanda 10 nysan boıynsha barlaý jumystaryn júrgizýde.
«Búgin biz 10 nysan boıynsha barlaý jumystaryn atqarýdamyz. Olardyń ishinde birneshe nysany mıneralızatsııa boıynsha jaqsy nátıjeler berýde. Bul negizinen Qaraǵandy oblysyndaǵy nysandar. Balqash kóli, Jezqazǵan, Sátpaev qalalary mańynda, ShQO-da - Rıdder, Arqalyq janynda barlaý júrgizip jatyrmyz. Negizinen biz altyn, mys, hrom syndy qazbalardy izdeýge kúsh salyp kelemiz», - deıdi kompanııa basshysy.
