Qazǵarysh 2026 jyldy Baıqońyrǵa saparlaý jyly dep jarııalady

ASTANA. KAZINFORM – Ǵarysh jaqyndap keledi: Qazaqstan Respýblıkasy Jasandy ıntellekt jáne tsıfrlyq damý mınıstrliginiń Aeroǵarysh komıteti Baıqońyrdyń týrıstik baǵdarlamasyn usyndy, dep habarlaıdy Kazinform tilshisi. 

Baıqońyrda alǵash ret naqty ókilettigi bar resmı kelýshiler ortalyǵy qurylyp jatyr. Kelýshiler ortalyǵy Baıqońyr qalasynyń kireberisindegi Tóretam kentinde ornalasady. Munda týrıster, mektep oqýshylary jáne sheteldik delegatsııalar «bir tereze» qaǵıdaty boıynsha ǵarysh nysanyna kirýge ruqsat ala alyp, baǵyttardy, baǵdarlar, ekskýrsııalardy jáne saıahat qaýipsizdigin talqylaı alady.

Balalarǵa arnalǵan ǵarysh týrızmine kóp kóńil bólinip jatyr. Bolashaq ınjenerler men ǵalymdar býynyn qalyptastyrý úshin Baıqońyr qalasynda ǵarysh lageri ashylady, onda balalar ǵarysh kemesinde tikeleı zymyran modeldeýdi, kosmonavtıka tarıhyn jáne ınjenerlik tehnologııalardy úırenedi. 

Demalys kúnderi týr da usynylady, bul ǵarysh aılaǵyna Qazaqstandaǵy kez kelgen basqa týrıstik qalasyna sııaqty barýdy jeńildetedi.

Qazǵaryshtyń jańa týrıstik baǵdarlamasy Baıqońyr ǵarysh aılaǵyna ótý júıesin jeńildetedi, saıyp kelgende ǵarysh keshenine kirý quny tómendeıdi. 

– Baıqońyr kópshilikke ǵylym, tarıh jáne bolashaq aýmaǵy retinde ashylyp jatyr. Baıqońyr – Qazaqstanǵa qalǵan mura. Al bizdiń mindetimiz – ony bolashaq urpaq úshin saqtaý jáne damytý, - delingen Qazǵarysh baspasóz qyzmetiniń habarlamasynda.

Belgili bolǵandaı, Baıqońyrdaǵy Gagarın ushyrý alańynda adamnyń ǵaryshqa alǵashqy ushýynyń 65 jyldyǵyna oraı murajaı ashý josparlanyp otyr. Sondaı-aq qazirgi ýaqytta «Báıterek» baǵdarlamasy boıynsha 2026 jyldyń naýryz aıynyń sońyna josparlanǵan «Soıýz-5» («Suńqar») zymyran tasyǵyshynyń tarıhı ushyrylýyna ótinim qabyldaý bastalyp jatyr.