«Qazfosfat» mıneraldyq tyńaıtqyshtar jetkizý geografııasyn keńeıtedi

TARAZ. QazAqparat - Jambyldyq «Qazfosfat»  hımııalyq kásipornynda eksportqa shyǵarylǵan alǵashqy 100 myń tonna tyńaıtqysh osy jyly Argentınaǵa jóneltiledi, dep habarlady «QazAqparat» HAA tilshisi ákimniń baspasóz qyzmetine silteme jasap.

«Kúneltý úshin satý, jańa naryqty ıgerý, logıstıkany damytý qajet», - dedi «Qazfosfat» JShS bas dırektory Muqash Eskendirov. - Sondyqtan jetkizý georgafııasy keńeıtilýde. Qytaı, Polsha, Rýmynııa, RF, Ýkraına, Baltyq jaǵalaýynan basqa «Qazfosfat» JShS tyńaıtqyshty alǵash ret Argentınaǵa eksporttaı bastaıdy. Osy jyly 100 myń tonna jetkizýdi josparlap otyrmyz. Ótken jyly kúzde Qytaıdyń Shyńjań-Uıǵyr avtonomııalyq okrýgine  40 myń tonnaǵa jýyǵy jóneltilgen. Búgingi kúnniń mindeti - kem degende taǵy 100 myń tonna ótim satý kerek».

Ótken jyly «Qazfosfat» JShS óziniń fılıaldarynyń biri - Mıneraldyq tyńaıtqysh zaýytynda ekstraktsııalyq fosfor qyshqyly tsehyn salýdy aıaqtady. Bul  EFQ óndirýdi eki esege ulǵaıtýǵa jáne 300 myń tonna kólemge shyǵýǵa múmkindik berdi. Ammofos tsehyn jóndegennen keıin 2018 jyly tyńaıtqyshty 500 myń tonnaǵa deıin  jetkizý josparlanýda.

2016 jyly «Qazfosfat» qýaty 5 myń tonna fosfor-kalıı tyńaıtqyshy óndirisin jáne jylyna 70 mln tekshe metr azot - aýa bólý blogyn iske qosty.

Osy jyldyń aıaǵynda Mıneraldyq tyńaıtqysh zaýytynda  2020 jyly kólemdi bir mıllıon tonnaǵa jetkizý úshin ammofos óndirý tsehyn jobalaý josparlanýda. Óz kezeginde, Qarataý jáne Jańatas fosfor ken oryndarynda ken óndirisi ulǵaıady. «Qazfosfattyń» basqa fılıalynda - Jańa jambyl fosfor zaýytynda búginde eki fosfor peshi jumys isteıdi. Maýsymnan bastap úsh peshtik rejimge kóshý josparlanýda. Eýropa, Amerıka, Úndistan naryqtaryna ónim jetkizý, sondaı-aq qysqy kezeńge rezerv qurý josparlanýda.

Oblystyq ákimdikte 2017 jyly kompanııa memleketke jeti mlrd, osy jyly segiz mlrd teńgege  jýyq salyq tólegenin atap ótti.

Hımııalyq ónerkásip qyzmetkeri kúnine oraı zaýyt jumysshylaryna  kompanııa esebinen «EKSPO» halyqaralyq kórmesine 600 joldama bólindi, dep atap ótti oblys ákiminiń baspasóz qyzmetinde.

 «Qazfosfat» JShS - Jambyl oblysynyń qala qurýshy kompanııasy. Onda negizgi óndiristik qýat shoǵyrlanǵan. 1999 jyly qurylǵan hımııa kásiporyndarynda 60 myńǵa jýyq jambyldyq jumys isteıdi.

Ótken jyldary kompanııa otandyq hımııa salasynyń kóshbasshysy atandy. Negizgi qazaqstandyq kásiporyn  fosfory bar ónimniń 20 túrin óndiredi.  Kompanııa ónimi álemniń 20-dan astam elderine jetkiziledi.