Qazfosfat kompanııasyndaǵy eńbek daýy: taraptar kelisimge keldi
Kompanııadan málimdegendeı, eńbek daýyna baılanysty 14 sáýirde Jańatas qalasyndaǵy kombınatta arnaıy komıssııa qurylǵan. Kelissózder nátıjesinde taraptar syndarly kelisimge keldi.
Búgingi tańda kompanııanyń barlyq kásiporyndary shtattyq rejımde jumys istep tur. Kásiporynda týyndaıtyn barlyq eńbek daýlary jedel sheshiletinin jáne kompanııa basshylyǵy árqashan óz qyzmetkerleriniń qajettilikterin qanaǵattandyrýǵa jáne konstrýktıvtilikke baǵyttalǵanyn atap ótken jón», - dep málimdedi kompanııadan.
Belgili bolǵandaı, bıyl qańtardan bastap kompanııa qyzmetkerlerdiń jalaqysyn kótergen. Shildege qaraı eńbekaqy mólsherin taǵy da ósirý josparlanyp otyr.
Eske salaıyq, bul atalǵan kompanııada týyndaǵan alǵashqy oqıǵa emes. Máselen, ótken jyly qarashada atalǵan kásiporynnyń 200-ge jýyq qyzmetkeri hımııa zaýyty basshylarynyń biriniń áreketine narazylyq bildirgen. Ol joly oqıǵa ornyna der kezinde barǵan Jambyl oblysy ákiminiń birinshi orynbasary Nurjan Kalenderov mekeme qyzmetkerlerimen kezdesip, túsindirý jumystaryn júrgizdi. Keıin eńbekkerlerge dóreki sóılegen azamat qyzmetinen bosatyldy.
Araǵa birneshe kún salyp, «Qazfosfat» JShS-de taǵy da eńbek daýy týyndady. Onda kásiporyn qyzmetkerleri kompanııa basshylyǵynan eńbekaqyny kóterýdi talap etti. Keıin qurylǵan arnaıy komıssııa 2023 jyldyń 1 qańtarynan bastap qyzmetkerlerdiń jalaqysyn 50 myń teńgege, 1 shildeden bastap taǵy 30 myń teńgege kóterý sheshimin qabyldady.
Al, bir aıdan soń, ıaǵnı byltyr jeltoqsanda Básekelestikti qorǵaý jáne damytý agenttigi tóraǵasynyń orynbasary Bolat Sámetov «Qazfosfat» zaýyty ammofos tyńaıtqyshyn joǵary baǵamen satyp kelgenin málimdedi. Tıisti tekeristen keıin zaýyt ammofos baǵasyn 185 myń teńgeden 173 myń teńgege tómendetti. Sondaı-aq, kásiporyn memleketke 697 mln teńge kóleminde zalaldy ótedi.
