«Qazflıývak» jáne «Reflıývak» vaktsınalary DDU-nyń talaptaryna tolyǵymen jaýap beredi - S.Mamadalıev
ASTANA. Jeltoqsannyń 7-si. QazAqparat /Quralaı Orynbekqyzy/ - «Qus» tumaýyna qarsy «Qazflıývak», «dońyz» tumaýyna qarsy «Reflıývak» vaktsınalary Dúnıejúzilik densaýlyq saqtaý uıymynyń talabyna tolyǵymen jaýap beredi.
Bul týraly búgin vaktsınalardy jasap shyǵarǵan QR Bilim jáne ǵylym mınıstrligi Bıologııalyq qaýipsizdik problemalarynyń ǵylymı-zertteý ınstıtýtynyń dırektory, professor Seıidǵappar Mamadalıev aıtty, dep habarlaıdy QazAqparat tilshisi.
«Biz alǵash ret medıtsınalyq vaktsınalar jasap shyǵardyq. Sondyqtan, osyndaı dári-dármekterge DDU-nyń qoıatyn barlyq talaptaryn muqııat zertteý qajet boldy. Instıtýttyń ǵalymdary vaktsınany jasap shyǵarý barysynda birqatar normatıvtik qujattardy qurastyrdy. Onyń ishinde 93 standarttyq laboratorııalyq protsedýralar, 4 laboratorııalyq reglament, 17 ádisteme jasaldy. Búginde osy tehnologııaǵa qatysty qujattar tolyǵymen rásimdelip boldy», - dedi professor.
Sonymen birge, professor vaktsınany jasap shyǵarý barysynda ınstıtýttyń ǵalymdaryna QR Densaýlyq saqtaý mınıstrliginiń mamandary men reseılik áriptester úlken kómek kórsetkendigin atap kórsetti.
