QazEÝ bilim berý úrdisine ECTS júıesin engizedi
ALMATY. 22 qańtar. QazAqparat /Erbol Turymbetov/ - Keshe T. Rysqulov atyndaǵy QazEÝ-de «Úzdiksiz ekonomıkalyq bilim berý: Oqytýdy jáne ádistemelik qamtamasyz etýdi jańartý» atty VI Respýblıkalyq oqý-ádistemelik konferentsııasyna arnalǵan baspasóz máslıhaty ótti.
Jyl saıyn dástúrli týrde bir taqyrypta ótkiziletin bul konferentsııa ashyq pikirler, dárister, semınarlar men basqosýlar, talqylaýlar alańy retinde qalyptasqan.
Baspasóz máslıhatynda ýnıversıtet rektory Álı Ábishev búginde qazaqstandyq dıplomnyń halyqaralyq deńgeıdegi mańyzyn arttyrý qajettiligin aıtty. «Biz kóp jyldar boıy nesıelik júıeni engizýmen aınalystyq. Endi Eýropalyq júıege aýysyp, qazaqstandyq JOO-nyń bilim berý úrdisine Esepteý jáne nesıeli jınaqtaýdyń Eýropalyq júıesin (ECTS) engizý qajettiligi týyp otyr», dedi Á. Ábishev.
Sonymen birge, rektor búginde akademııalyq utqyrlyq máselesiniń basty nazarda turǵanyn atap ótti. «QR-daǵy bilim berýdi damytýdyń 2011-2020 jyldarǵa arnalǵan memlekettik baǵdarlamasynda kórsetilgendeı, qazaqstandyq stýdentterdiń 20%-ynyń akademııalyq utqyrlyq deńgeıin jetildirý jáıi aıtylǵan. Jańa júıede biz osy máseleni qolǵa almaqpyz», - dedi rektor.
Qazaq-nemis ýnıversıtetiniń prorektory Olga Moskovchenkonyń aıtýynsha, jańa júıe arqyly biz eýropalyq standarttarǵa saı mamandardy ózimizde daıyndaıtyn bolamyz. «Búginge deıin bizdiń stýdentter «Bolashaq» baǵdarlamasy boıynsha shetelderde oqyp keldi. Endi ECTS júıesi arqyly mamandar Qazaqstanda daıyndalatyn bolady», dedi O. Moskovchenko. Sonymen qatar, O. Moskovchenko endi sheteldik stýdentterdiń bizdiń elde bilim alýǵa jaǵdaı týatyndyǵyn málim etti.
