KAZENERGY qazaqstandyq stýdentterge 1 mln. AQSh dollary bolatyn bilim granttaryn úlestirdi
ASTANA. QazAqparat - KAZENERGY tórt jyldan beri bilim berý baǵdarlamasyn júzege asyrýda. Onyń aıasynda byltyr Soltústik Kaspıı jáne Qarashyǵanaq jobalarynyń qarajaty esebinen 590 qazaqstandyq stýdentke 2016-2017 jylǵy oqý jylyna arnalǵan bilim granttary tabys etildi. Onyń jalpy somasy 1 mln. AQSh dollarynan asady.
Bul týraly 25 qańtarda Tımýr Qulybaevtyń tóraǵalyq etýimen ótken KAZENERGY qaýymdastyǵy keńesiniń kezekti 21-májilisinde málim boldy, dep xabarlaıdy QazAqparat.
Stýdentter kúrdeli eki deńgeılik baıqaýdan ótti. Sonymen qatar 2016-2017 oqý jylyna arnalǵan KAZENERGY ataýly shákirtaqysy QR JOO 16 stýdentine jáne kolledjderdiń 15 stýdentine úlestirildi.
Sondaı-aq KAZENERGY bas dırektory Bolat Aqsholaqov qatysýshylardy bıylǵy 2017 jylǵa arnalǵan KAZENERGY jumys jospary týraly habardar etti. Qaýymdastyq bıyl da «Jer qoınaýy jáne jer qoınaýyn paıdalaný» kodeksin jáne basqa da quqyqtyq aktilerdi, qala qurylysy týraly jáne arhıtektýralyq qujattamalardy, sonymen qatar standarttaý boıynsha normatıvtik qujattardy ázirleý jumystaryna qatysýyn jalǵastyrmaq. Birlesken salyq jáne keden kodeksin qalyptastyrý boıynsha jumystarǵa basa nazar aýdarylady.
Bıylǵy jyly «Kazenergy-2017» ulttyq energetıkalyq baıandamasynyń 3-shi redaktsııasy boıynsha jumystardy bastaý josparlanyp otyr. Bul joba respýblıkanyń barlyq sarapshylyq qaýymdastyǵy úshin mańyzdy oqıǵa bolyp tabylady jáne oǵan árdaıym kópshilik qyzyǵýshylyq tanytady.
Qaýymdastyq Tóraǵasy Tımýr Qulybaev keńesti qorytyndylaı kele KAZENERGY qaýymdastyǵynyń 6 jańa múshesin - «Maersk Oıl Qazaqstan GmbH», «MOL (FED) Kazakhstan B.V.», «OMV Petrom S.A.», China Petrochemical Corporation (Chaına Petrokemıkal Korporeıshn) kompanııasynyń QR-daǵy ókildigi, «QMÓZ» JShS, «Jobaqurylysservıs» JShS-ny múshelikterimen quttyqtap, sertıfıkat tapsyrdy.
