«Kazenergy»: Qazaqstanda kólikterdiń bes paıyzy gazben júre alady
ASTANA. QazAqparat - Gazben júretin kólikterdiń kólemin bes paıyzǵa deıin ósirýge bolady. Bul týraly búgin Astanada «Ulttyq baıandama 2013» tanystyrylymynda «Kazenergy» qaýymdastyǵynyń bas dırektory Áset Maǵaýov málim etti.
«Sońǵy 10 jylda álemde gazdy kólik otyny túrinde paıdalaný 7 esege artty. Qazaqstanda bul baǵytta qanatqaqty jobalar endi ǵana bastaldy. Bul Almaty qalasynda «QazTransGaz» júzege asyryp otyrǵan jobalar, sonymen qatar osy tektes baǵdarlamany olar Shymkentte bastaýda. Rezervter aýqymdy. Bizdiń paıymymyzsha, Qazaqstanda otyndy tutynýdyń qurylymynda gazmotorlyq otynnyń úlesi bes paıyzǵa deıin jetýi múmkin», - dedi ol.
Sonymen qatar Á. Maǵaýov gazdy óndirý máselesine toqtaldy. Onyń sózine qaraǵanda, aldaǵy ýaqytta suıyq kómirsýtekterdiń negizgi bóligi óndirilgennen keıin, taýarlyq gazdy óndirý deńgeıi artady.
«Bizdiń boljam boıynsha, bolashaqta, ıaǵnı 2021 jyldan keıin taýarlyq gazdy óndirýdiń tómendeýi baıqalady. Alaıda, 2030 jylǵa qaraı gazdyń osy túrin óndirý artatyn bolady. Osy kezeńde bizge gazdy óńdeıtin qýattardy arttyrý kerek, sondaı-aq gazdy bólý men tasymaldaý máselelerine mán berý qajet», - dedi bas dırektor.
