«Kazenergy» qaýymdastyǵy Qazaqstandaǵy munaıly aımaqtardyń ekologııalyq qaýipsizdigin qadaǵalaýdy qolǵa alýda
ASTANA. 30 sáýir. QazAqparat /Jasulan Amanbaıuly/ - «Kazenergy» qaýymdastyǵy Qazaqstandaǵy munaıly aımaqtardyń ekologııalyq qaýipsizdigin jáne eldegi munaı kompanııalarynyń ken oryndaryndaǵy ekologııalyq qaýipsizdikti qamtamasyz etýge qosqan úlesterin qadaǵalaýdy qolǵa almaq.
Bul týraly búgin Astanada «Elordaǵa arnalǵan aǵash otyrǵyz» aktsııasy kezinde «Kazenergy» Qazaqstan munaı-gaz jáne energetıka kesheni uıymdary qaýymdastyǵynyń atqarýshy dırektory Álıakpar Matıshev málim etti.
Á. Matıshevtiń aıtýynsha, jalpy qaýymdastyq eldiń ekologııalyq máselelerine úlken kóńil bólip keledi. «Qazirgi ýaqytta munaı kompanııalarynyń eldegi munaı ken oryndaryndaǵy ekologııalyq qaýipsizdigin qamtamasyz etýge qosqan úlesterin qadaǵalaýǵa jáne eldegi munaıly ólkelerdegi ekologııalyq qaýipsizdikti saqtaýǵa baǵyttalǵan Qazaqstan boıynsha aýqymdy jobany qolǵa alyp jatyrmyz. Mundaı jobalardy bizdiń qaýymdastyqtyń ekologııalyq qaýipsizdik keńesi atqarady», - dedi qaýymdastyq dırektory.
«Elordaǵa arnalǵan aǵash otyrǵyz» aktsııasy ekologııalyq aılyq aıasynda ótkizilýde. Oǵan qalanyń 100-den astam kásiporyndary men mekemeleri qatysqan bolatyn.
«Búgingi aktsııa kezinde «KAZENERGY» qaýymdastyǵynyń qyzmetkerleri qaladaǵy "Araı" saıabaǵynda 20-ǵa tarta jas aǵash otyrǵyzdy. Endi Astanada bizdiń ózimizdiń jasyl orynjaıymyz bar», - deıdi «KAZENERGY» qaýymdastyǵynyń atqarýshy dırektory Álıakpar Matıshev.
Onyń aıtýynsha, Astanadaǵy Beıbitshilik saraıyna qarama-qarsy tusynda qaýymdastyqtyń jeke alleıasy bar. «Qalany kóriktendirýge jáne kógaldandyrýǵa salǵan úlesimiz retinde biz munaıshylar alleıasyn ashqan bolatynbyz», - dep atap kórsetti ol.
