KAZENERGY qaýymdastyǵynyń jańa tóraǵasy saılandy
ASTANA. KAZINFORM — Budan bylaı KAZENERGY qaýymdastyǵyn Bolat Aqsholaqov basqaratyn bolady.
Búgin KAZENERGY qaýymdastyǵynyń basshylyǵyndaǵy kadrlyq ózgeristerge qatysty kezekten tys jınalys ótip, jańa tóraǵa saılandy. Іs-sharaǵa Qaýymdastyq quramyna kiretin kompanııalardyń basshylary qatysty.
Memleket basshysynyń keńesshisi bolyp taǵaıyndalǵan Maǵzum Myrzaǵalıev KAZENERGY tóraǵasy retindegi ókilettiginiń toqtatylǵany týraly habarlap, osy laýazymǵa Bolat Aqsholaqovtyń kandıdatýrasyn usyndy.
— Bolat Oraluly «QazMunaıGaz» UK AQ, «Qazatomónerkásip» UAK» AQ, «Samuryq-Qazyna» UÁQ» AQ sııaqty iri ulttyq kompanııalardaǵy basshylyq laýazymdarda úlken jumys tájirıbesi bar. Ol sondaı-aq QR Energetıka mınıstri jáne Memleket basshysynyń keńesshisi sııaqty joǵary memlekettik qyzmetterdi atqardy. Sonymen qatar, Bolat Oraluly bizdiń Qaýymdastyqty eki ret Bas dırektor retinde basqardy jáne onyń esimi kásibı ortada keńinen tanymal, — dep atap ótti Maǵzum Myrzaǵalıev.
Bolat Aqsholaqovtyń kandıdatýrasyn KAZENERGY qaýymdastyǵyna múshe barlyq kompanııalar biraýyzdan qoldady.
Jınalysqa qatysýshylar sonymen qatar Maǵzum Myrzaǵalıevke elimizdiń energetıka salasyn damytýǵa qosqan eleýli úlesi úshin alǵys bildirdi.
Osyǵan deıin Maǵzum Myrzaǵalıev Prezıdenttiń keńesshisi laýazymyna taǵaıyndalǵanyn habarladyq.