KAZENERGY dızel otynynyń qymbattaý sebepterin túsindirdi
ASTANA. QazAqparat - «KAZENERGY» qaýymdastyǵynyń atqarýshy dırektory Rústem Qabjanov Qazaqstanda dızel otyny ne sebepti qymbattaǵanyn túsindirdi, dep habarlaıdy QazAqparat.
«Búginde janarmaı quıý stansalarynda bir lıtr dızel otynynyń quny 185-187 teńge aralyǵynda. Zaýytta otynnyń lıtri 150 teńge turady. Osy baǵaǵa lıtrine 5 teńge somasynda tasymaldaý qunyn, 4 teńge shamasynda munaı bazalarynda saqtaý shyǵyndaryn, sondaı-aq árbir lıtrine 2 teńge kólemindegi marjany qosamyz. Nátıjesinde, aýyl sharýashylyǵy taýarlaryn óndirýshiler úshin lıtrine 161 teńgelik qun qalyptasty, ıaǵnı bul ortasha baǵa. Óńirlerge qaraı aıyrmashylyq 26-30 teńge aralyǵynda», - dedi Rústem Qabjanov brıfıng barysynda.
Osy oraıda ol otynnyń qymbattaýy zaýyttarda protsessıng mólsherlemesiniń artýy esebinen bolǵanyn túsindirdi. Bul turǵyda janarmaı óndirý boıynsha zaýyttardyń shyǵyndary joǵarylady. Munaı óńdeý zaýyttaryndaǵy jańǵyrtý jumystarynan keıin, protsessıng mólsherlemesi 15 paıyzǵa artty.
Sarapshynyń paıymynsha, dızel otynynyń qymbattaýyna engizilgen aktsızder de yqpal etti.
«Bul turǵyda tonnasyna 10 myń teńgege tarta joǵarylady», - dep naqtylady Rústem Qabjanov.
Aıta keteıik, Astanada ótken brıfıng barysynda «KAZENERGY» qaýymdastyǵynyń atqarýshy dırektory Qazaqstanda tórtinshi munaı óńdeý zaýytynyń qurylysyna qatysty málimettermen bólisti.
