KazEnergy áıelder klýby óz daǵdylaryn saladaǵy ahýaldy jaqsartýǵa paıdalanady – Lázzat Ramazanova
KazEnergy áıelder energetıkalyq klýby óz daǵdylaryn saladaǵy ahýaldy jaqsartýǵa paıdalanady. Bul týraly Prezıdent janyndaǵy Áıelder isi jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Ramazanova aıtty, dep habarlaıdy QazAqparat tilshisi.
«Energetıka salasynda áıelderdiń jumys isteýiniń jónsizdigi joq. Bul Qazaqstan tarıhyndaǵy jańalyq emes. Ol únemi bolǵan. Degenmen, búginde biz jańa kadrlarmen tolyqtyrý qajettigi jaıly aıtyp otyrmyz. Qyzdarymyz jigittermen qatar turyp, ekonomıkanyń joǵary jalaqy tólenetin salalarynda jumys istegenin qalaımyz. Olar da tolyq bir salanyń damýyna úles qosýy tıis. Bul salalarǵa jumys isteýge qaratyn kez kelgen adamǵa burynnan beri qatań talap qoıylady. Ol: joǵary kásibılik, qatań tártip jáne kóptegen daǵdy. Qazaqstan ekonomıkasynyń kóptegen salasy tsıfrlandyrýǵa bet buryp jatyr. Bul da ýaqyt talaby», - dedi ol KazEnergy energetıkalyq forýmy aıasynda BAQ ókilderine bergen suhbatynda.
Onyń aıtýynsha, búgingi forým aıasynda STEM (STEM - jaratylystaný, tehnologııa, ınjenerııa jáne matematıkany biriktirý úshin qoldanylatyn keń aýqymdy termın) salasynda qansha áıel jumys isteıtindigine qatysty másele talqylanǵanyn atap ótti.
«Bizde STEM-de jumys isteıtin áıelderdiń úlesi 0,2 paıyz ǵana. Al ekonomıkanyń barlyq salasyna nyq qadam basqan ІT salasyn alsaq, ondaǵy áıelder úlesi álem boıynsha 29 paıyzdy quraıdy. Barlyq óndiristik jáne bıznes-protsester tsıfrlyq formatqa kóship, baǵdarlamalar men tehnologııalyq protsesterdiń basym bóligi jasandy ıntellektimen baqylanatyn jaǵdaıda bul áıelderge ǵana emes, erlerge de úlken syn-tegeýrin. Sondyqtan da KazEnergy áıelder energetıkalyq klýby óziniń kásibı jáne zerteýshilik daǵdylaryn saladaǵy jaǵdaıdy jaqsartýǵa jumsaıtyn bolady», - dedi Lázzat Ramazanova.
