«Qazenerdjı» qaýymdastyǵynyń qyzmeti kúsheıedi
ASTANA. 19 sáýir. QazAqparat - Aldaǵy ýaqytta «Qazenerdjı» munaı-gaz jáne energetıka kesheni uıymdarynyń qazaqstandyq qaýymdastyǵynyń qyzmeti kúsheıedi. Bul týraly búgin qaýymdastyq keńesiniń otyrysynda uıymnyń bas dırektory Áset Maǵaýov málim etti.
Onyń aıtýynsha, búginde QR Munaı jáne gaz mınıstrligimen birlese otyryp memlekettik satyp alýlardyń ortaq alańyn qurý qarastyrylyp otyr. «Osy salada ońtaıly tájirıbe qalyptasqan. Jalpy, Úkimet basshysynyń orynbasary Áset Isekeshevtiń tóraǵalyǵymen ótken keńeste «Qazenerdjı» qaýymdastyǵynyń úılestirý qyzmetin kúsheıtý qajettigi týraly aıtylǵan. Ony barlyǵy qoldady. Osyǵan oraı QR Indýstrııa jáne jańa tehnologııalar mınıstriligi men QR Munaı jáne gaz mınıstrliginiń arnaıy buıryǵy shyǵyp, tıisti quziretter qaýymdastyqqa beriledi dep senemiz», - deıdi Á.Maǵaýov. Sondaı-aq uıymnyń bas dırektory atap kórsetkendeı, aldaǵy ýaqytta energetıka salasyndaǵy ónim jetkizýshilerdiń aqparattyq portalyn ashý josparlanǵan.
