«Qaztsınk-Torpedo» hokkeı klýby «Saryarqadan» esesin qaıtara almady
ASTANA. 30 jeltoqsan. QazAqparat - Keshe Joǵary hokkeı lıgasynyń kezekti matchy aıasynda Óskemen qalasynyń «Qaztsınk-Torpedo» hokkeı klýby óz alańynda qaraǵandylyq «Saryarqany» qabyldady.
Bul oıynda «Saryarqanyń» forvardy Mıhaıl Maho erekshe kózge tústi. Birinshi kezeńniń basynda ol esep ashyp, ekinshi kezeń aıaqtalǵansha, het-trık, ıaǵnı úsh birdeı shaıbanyń avtory atandy. Sondaı-aq onyń kómegimen Anatolıı Vasılev «Qaztsınk-Torpedonyń» qaqpashysyn taǵy bir ret qapy qaldyrdy. Esep - 0:4. Úshinshi kezeńde alań ıeleri esep aıyrmasyn tek eki shaıbaǵa ǵana qysqarata bildi. Sóıtip, bıylǵy chempıonat aıasynda «Saryarqa» Óskemen qalasynyń hokkeı klýbyn ekinshi ret jeńip otyr. Buǵan deıin Qaraǵandyda «Qaztsınk-Torpedo» 6:0 esebimen utylǵan edi.
Búginde Joǵary hokkeı lıgasynyń jalpytýrnırlik kestesinde «Saryarqa» 4-shi orynǵa ornalassa, «Qaztsınk-Torpedo» hokkeı klýby 8-shi orynda keledi.
