«KAZCHESS AWARDS - 2024»: Astanada shahmattan «úzdik komanda» anyqtaldy
ASTANA. KAZINFORM - Elordada dástúrli «KazChess Awards» syılyǵy tabystaldy. Bıyl qatarynan ekinshi jyl atalǵan júldemen úzdik sportshylar, jattyqtyrýshylar, tóreshiler jáne Qazaqstanda shahmat sportynyń damýyna súbeli úles qosyp júrgen azamattar marapattaldy. Bul týraly elorda ákimdiginiń resmı saıty jazdy.
Bıyl nomınatsııalar tizimi 12 sanatqa deıin keńeıtildi, ótken jyly 9 nomınatsııa bolǵan. Saltanatty is-sharaǵa Týrızm jáne sport mınıstri Ermek Marjyqpaev, Qazaqstan shahmat federatsııasynyń prezıdenti Tımýr Týrlov, Astana qalasy Dene shynyqtyrý jáne sport basqarmasynyń basshysy Vasılıı Levıt sondaı-aq ataqty sportshylar, eńbek sińirgen jattyqtyrýshylar jáne ózge de tulǵalar qatysty.
Marapattaý rásiminde Týrızm jáne sport mınıstri Ermek Marjyqpaev keıingi jyldary elimizde shahmat sporty qarqyndy damyp kele jatqanyn atap ótti.
Jeńimpazdar Qazaqstan shahmat federatsııasy prezıdıým músheleriniń daýys berý jolymen tańdaldy. Jeńimpazdardy anyqtaý kezinde sportshylardyń halyqaralyq jáne respýblıkalyq jarystardaǵy jeke kórsetkishteri eskerildi.
Astana qalasynyń burymdy sportshylary da sol on eki atalymnyń úzdikter qatarynan kórindi. Atap aıtar bolsaq, Dınara Sádýaqasova, Amına Kaırbekova men Merýert Kamalıdenova «Úzdik komanda» atalymyn jeńip aldy.
Esterińizge salsaq, Qytaı eliniń Hanchjoý qalasynda ótken XIX Jazǵy Azııa oıyndarynda shahmattan Qazaqstannyń áıelder quramasy qola júlde ıelengen bolatyn. Qurama sapynda qazaqstandyq bes sportshy óner kórsetti. Onyń ekeýi Astana qalasynyń burymdy shahmatshylary Merýert Kamalıdenova men Dınara Sádýaqasova.
Aıta ketý kerek, sporttyń osy túrin damytýǵa baǵyttalǵan «Mekteptegi shahmat» jobasy aıasynda búginde 983 mektepte zııatkerlik oıyn sabaqtary ótkiziledi. Onyń ishinde 110 mektepte mindetti pán retinde oqytylady. Sondaı-aq 2023 jyly 2 myńnan astam qatysýshyny qamtyǵan áýesqoılar arasynda shahmatty nasıhattaýǵa baǵyttalǵan «Shahmat kerýeni» respýblıkalyq jobasy iske asyryldy.
