Qazbek Táshimov Veterınarııalyq baqylaý jáne qadaǵalaý komıtetiniń tóraǵasy boldy

ASTANA. KAZINFORM – Búgin Qazaqstan Respýblıkasynyń Aýyl sharýashylyǵy mınıstri Aıdarbek Saparov Veterınarııalyq baqylaý jáne qadaǵalaý komıtetiniń jańa tóraǵasy Qazbek Qazıhanuly Táshimovti tanystyrdy.

Osy laýazymǵa taǵaıyndalǵanǵa deıin Qazbek Táshimov QR AShM Veterınarııalyq baqylaý jáne qadaǵalaý komıteti tóraǵasynyń orynbasary qyzmetin atqardy.

Ol 1980 jyly Batys Qazaqstan oblysy Tasqala aýdany Kamenka aýylynda dúnıege kelgen.

2001 jyly Batys Qazaqstan memlekettik ýnıversıtetin «veterınarııalyq sanıtarııa» mamandyǵy boıynsha bitirgen. 2005 jyly sol ýnıversıtette «Quqyqtaný» mamandyǵy boıynsha ekinshi joǵary bilim aldy.

Kásibı qyzmetin 2002 jyly Qazaqstan Respýblıkasy Aýyl sharýashylyǵy mınıstrligi Tasqala aýdandyq aýmaqtyq basqarmasynyń jetekshi mamany qyzmetinen bastady. 2005-2011 jyldar aralyǵynda Batys Qazaqstan oblysy Tasqala aýdany ákiminiń apparatynda ártúrli laýazymdarda qyzmet atqardy.

2011 jyldan bastap Batys Qazaqstan oblysy Aýyl sharýashylyǵy basqarmasynyń veterınarııa bólimin basqardy, al 2015 jyly Batys Qazaqstan oblysy veterınarııa basqarmasynyń basshysy bolyp taǵaıyndaldy.

2017 jyldan 2021 jylǵa deıin Batys Qazaqstan oblysynyń veterınarııa basqarmasy basshysynyń orynbasary qyzmetin atqardy.

2021-2024 jyldar aralyǵynda Mańǵystaý oblysynyń Aýyl sharýashylyǵy basqarmasyn basqardy.