Qazbek Ámirjanov: Jamanqulov maǵan eshqandaı tapsyrmalar bergen joq
ALMATY. QazAqparat - Almaty qalasyndaǵy №2 Medeý aýdandyq sotynda Tuńǵyshbaı Jamanqulovtyń isi boıynsha sot otyrysy ári qaraı jalǵasýda. Búgingi otyrysta «Fenıks» fılminiń burynǵy qoıýshy-operatory Qazbek Ámirjanov sot aldynda jaýap berdi.
«Men «Fenıks» fılminiń stsenarııin oqyp shyqtym. Maǵan óte unady. Bul álemdik deńgeıdegi stsenarıı bolatyn. Bul fılm meniń qoıýshy-operator retinde álemdik deńgeıge shyǵýyma zor múmkindik beretin edi. Al qarjylyq jaǵyna keletin bolsam, ol men úshin eń tómengi aılyq kórsetkishi boldy»,-dedi Q.Ámirjanov. Onyń aıtýynsha, Jamanqulov qoıýshy-operatorǵa eshqandaı tapsyrmalar bermegen.
«Qazaqfılm» kınostýdııasymen arada avtorlyq quqyq máselesine qatysty kelisim-shart jasastyq. Bul shartta men ózimniń avtorlyq quqyǵymdy «Qazaqfılm» AQ beretin bolyp, qol qoıdym. Men túsirilim jumystaryna qatystym jáne operatorlar tobyna basshylyq jasadym. Biz jobanyń sahna jumystaryn túsirdik. Biz aldyn ala daıyndyq barysynda qajet degen kadrlardy túsirdik. Daıyndyq sharalary Baıqońyrda boldy. Boljamdy kezeńde 1-1.5 aı jumys istep, 500-600 teńge jalaqy aldym. «Qazaqfılm» AQ bólek maǵan esh jerden aqsha túsken joq. Qolma-qol jáne qolma-qol aqshasyz tólem boldy. Jobany konservatsııalaǵannan keıin, «Qazaqfılm» AQ aradaǵy kelisim-shart buzyldy»,-dedi Qazbek Ámirjanov sottaǵy sózinde.
Aıta ketelik, qazaqstandyq belgili akter jáne prodıýser Tuńǵyshbaı Jamanqulovtyń ótken jyldyń 2-inshi qarashasynda ustalǵany málim boldy. Oǵan «Fenıks» kórkem fılmin túsirýge bólingen bıýdjet qarajatyn urlady degen aıyptar taǵylýda. Tergeý barysynda anyqtalǵandaı, «Qazaqfılm» AQ atalǵan fılmniń aldyn-ala jáne daıyndyq kezeńderindegi jumystarǵa «T.K. Turan Universal Business» JShS-ine 79 mln. teńge aýdarady. Sol qarajattyń 69 mln. teńgesin fılmniń bas prodıýseri Tuńǵyshbaı Jamanqulov urlaǵan. Urlanǵan aqsha qosalqy merdigerlik uıymdar arqyly qolma-qol aqshaǵa aınaldyrylyp, T. Jamanqulovqa berilgen. Sonymen qatar, aqsha jymqyrýǵa «Qazaqfılm» AQ-nyń ekonomıka jáne qarjy jónindegi basqarýshy dırektory Gaýhar Ysqaqova men «Fenıkstiń» atqarýshy prodıýseri Natalıa ıÝdınanyń qatysy bolǵany da dáleldendi. Olar qazir sottyń sanktsııasymen qamaýǵa alyndy.
Aıtarlyǵy, T. Jamanqulov óziniń qorǵaýshysynyń kózinshe «Fenıkske» bólingen bıýdjet qarajatyn urlaǵanyn moıyndady. Óziniń jasaǵan qylmysyna ókinip, keltirilgen shyǵyndy óteýge mindetteme aldy. Ol qolma-qol aqshaǵa aınaldyrylǵan qarajatty rastap, ony óziniń jeke basynyń qajettilikterine jumsalǵanyn aıtty. Sonymen birge, ol ózine qatysty bultartpaý sharasyn kepilge bosatýǵa ózgertýge ótinish berdi. Al Qazaqstan Respýblıkasynyń Qylmystyq kodeksiniń 65-inshi babyna sáıkes, eger qylmys jasaǵan adam der kezinde óz kinásin moıyndasa, kepilge bosatylady. Aǵymdaǵy jyldyń 3-inshi qarashasynda Tuńǵyshbaı Jamanqulov óziniń jeke basynyń bedelin, ulǵaıǵan jasyn eskere otyryp, keltirilgen shyǵynnyń belgili bir bóligin ótedi. Sonyń nátıjesinde bultartpaý sharasy «kepilge» ózgerdi. Erikti túrde ókinýge baılanysty qylmystyq jaýapkershilikten bosatý jónindegi ótinish hat T. Jamanqulov, N. ıÝdına jáne G. Ysqaqovalar keltirilgen shyǵyndy tolyq ótegende ǵana qaralady.
