Qazba baılyqty ıgerýge lıtsenzııa alýshylar qosymsha bonýs tóleýge mindettelmek

ASTANA. QazAqparat – Qatty paıdaly qazba kenishin ıgerý aýktsıonyn utqan kompanııalar memleketke qol qoıý bonýsyn tóleýi múmkin. Bul týraly Premer-Mınıstrdiń birinshi orynbasary Roman Sklıar Senat depýtattarynyń saýalyna bergen jaýabynda aıtty, dep habarlaıdy QazAqparat tilshisi.

«Parlament Májilisiniń depýtattary bastamashylyq etken «Jer qoınaýy jáne jer qoınaýyn paıdalaný týraly» kodeksine jer qoınaýyn paıdalaný salasyn jetildirý máseleleri boıynsha ózgerister men tolyqtyrýlar engizý týraly» zań jobasynda paıdaly qatty qazbalar boıynsha jer qoınaýyn paıdalanýǵa lıtsenzııa berilgenge deıin aýktsıon qorytyndylary boıynsha qol qoıý bonýsyn tóleý jónindegi mindetteme kózdelgen.

Bul aýktsıon ótkizý jáne lıtsenzııalar berý qaǵıdalarynda bekitilgen kepildik jarnamen jáne ózge de tásildermen retteledi», - dep jazady ol.

Roman Sklıardyń aıtýynsha, atalǵan ózgertýler Prezıdent Ákimshiliginiń qaraýyna joldanǵan.

«Qazirgi tańda zań jobasyna Úkimet daıyndaǵan qorytyndynyń jobasy Prezıdent Ákimshiliginiń qaraýynda jatyr. Osydan keıin Parlament Májilisine engiziledi», - dep jazady vıtse-premer.